هاوپەیمانى فەتح و دەوڵەتى یاسا، سێ كەسی دیكە بۆ پێكھێنانی حكومەتی نوێی عێراق پێشنیاز دەكەن.
بەگوێرەی هەواڵی چەند میدیایەکی عێراقی، هەردوو هاوپەیمانى فەتح بە سەرۆکایەتى هادی عامرى و دەوڵەتى یاسا بەسەرۆکایەتى نورى مالیکى، سێ کەسی دیکەیان بۆ شوێنگرتنەوەى عەدنان زورفى کاندیدى راسپیردراو، بۆ پێکهێنانى حکومەت پێشنیارکردووە، کە بریتین لە، قاسم ئەعرەجی وەزیری پێشووی ناوخۆ و عەبدولحوسێن عەبتان، وەزیری وەرزش و لاوان و عزەت شابەندەر، پەرلەمانتاری پێشووی عێراق.
ئەمەش هاوکاتە لەگەڵ سەردانەکەی ئیسماعیل قائانی، فەرماندەی فەیلەقی قودسی سوپای پاسدارانی ئێران، بۆ بەغدا و کۆبوونەوەی لەگەڵ ژمارەیەک سەرکردەی لایەنە سیاسییەکانی عێراق.
ئەمە دوای ئەوەدێت عەدنان زورفی، لە 17/3/2020 لەلایەن سەرۆك كۆماری عێراقەوە، بۆ پێكھێنانی كابینەی نوێی حكومەتی عێراق راسپێردراو، بەڵام بەشێك لەلایەنەكانی عێراق پاڵپشتی لە زورفی ناكەن. بۆیە چاوەڕوان دەكرێت ئەویش وەك محەمەد تۆفیق عەللاوی بكشێتەوە.
