١٢ فەرمانبەر دەستگیر کران
باسک نێت
دەستەی دەستپاکی فیدراڵی ڕایگەیاند که فەرمانی دەستگیرکردن بۆ بەڕێوەبەری پێشووی بەڕێوەبەرایەتیی دابەشکردنی کارەبای موسەننا لەگەڵ ١٢ تۆمەتباری دیکە جێبەجێ کراوە، لە دۆسیەیەکی بەفیڕۆدانی زیاتر لە شەش ملیار دیناردا.
ئاشکراکردنی بەهەدەردانی دارایی لە کارەبای موسەننا
دەستەی دەستپاکی لە بەیاننامەیەکدا ڕایگەیاند: “تیمی مەیدانی لە فەرمانگەی لێکۆڵینەوەی موسەننا، دوای لێکۆڵینەوەی ورد و سەردانی بۆ کۆمپانیای گشتی بۆ دابەشکردنی کارەبای باشوور/ لقی موسەننا، بەهەدەردانی بڕی ٦ ملیار و ١٥٠ ملیۆن دیناری ئاشکرا کردووه.”
لە لێکۆڵینەوەکەدا دەرکەوتووە کە بەشی دابەشکردنی کارەبای پارێزگاکە کەلوپەلی کارەبایی بەم بڕە پارەیە کڕیوە سەرەڕای ئەوەی هیچ پێویستییەکی ڕاستەقینەی پێیان نەبووە.
بڕیاری دادگا و دەستگیرکردنی تۆمەتباران
دەستەی دەستپاکی ئاماژەی بەوەش کرد کە دادوەری دادگای لێکۆڵینەوەی موسەننا، بڕیاری داوە بە دەستبەسەرکردنی بەڕێوەبەری پێشووی کارەبای موسەننا و ١٢ فەرمانبەر بەپێی مادەی ٣٤٠ لە یاسای سزادانی عێراقی.
دەستگیرکراوەکان بریتین لە بەرپرسانی پێشووی بەشی ژمێریاری و فرۆشتن لە بەڕێوەبەرایەتییەکە، بەرپرسانی بەشەکانی وردبینیی ناوخۆیی، وێستگەکان، کۆگای بەکارهاتوو و ئەندامانی لیژنەی کڕین.
سەرەڕای ئەوەش، دادگا فەرمانی دەستگیرکردن و پشکنینی بۆ سێ کارمەندی دیکە دەرکردووە، کە لە نێویاندا بەرپرسێکی پێشووی بەشی ژمێریاریی بەڕێوەبەرایەتییەکە هەیە.
