بەشێک لە پزیشکانی شارو شارۆچکەکانی هەرێمی کوردستان داواكارییه‌كی به‌په‌له ئاڕاسته‌ی لایەنه په‌یوه‌ندیداره‌كانی هه‌رێمی كوردستان ده‌كه‌ن.
ئه‌و پزیشكانه له ڕاگه‌یه‌ندراوه‌كه‌یاندا ده‌ڵێن “داوا لە بەڕێزتان دەکەین کە مافی یاسایی و ئیداریی خۆتان بەکاربێنن لە ٣⁄١١ بۆ ٣⁄٢٥ واتا تەنھا بۆ ماوەی دوو ھەفتە، لێپێچینەوەی تووند و سزای یاسایی ھەموو ئەو کەس و لایەنانەی کە بە ئەنقەست دژی ھۆشیاریی خەڵکن و بە ھەڵسوکەوتەکانیان دەبنە ھۆکارێک بۆ خولقاندنی ئافات و کارەسات”.
ئاماژه‌یان به‌وه‌شداوه، “ھەموو کۆبوونەوەیەکی شوێنە گشتییەکان بەتایبەت ناو بازاڕەکان، قەدەغەبکرێت و سەرپێچیکار سزای یاسایی تووند بدرێت”.
ده‌قی ڕاگه‌یه‌ندراوه‌كه:
به‌ڕێز سه‌رۆكی هه‌رێمی كوردستان
بەڕێزان سەرۆکایەتیی ئەنجومەنی وەزیران
بەڕێزان وەزارەتی ناوخۆی حکومەتی ھەرێم
بەڕێزان ئاسایشی گشتیی ھەرێم
بەناوی بەشێک لە پزیشکانی دڵسۆز و خەمخۆری کوردستانیان، لە سۆنگەی دڵسۆزییمان بۆ تەندروستیی گشتیی و ژیانی ھاونیشتمانیانمان، لە سەروبەندی ڕێکارەکانی خۆپاراستن لە ڤایرۆسی کۆڕۆنا و نەخۆشیی کۆڤید و پابەند بە ڕێنماییەکانی ڕێکخراوی تەندروستیی جیھانیی، ڕێگریی کردن لە ڕوودانی کارەسات، داوا لە بەڕێزتان دەکەین کە مافی یاسایی و ئیداریی خۆتان بەکاربێنن لە ٣⁄١١ بۆ ٣⁄٢٥ واتا تەنھا بۆ ماوەی دوو ھەفتە ئەم داواکارییانە بخرێتە بواری جێبەجێ کردن، تکا دەکەین بۆ سەلامەتیی ھەموو لایەکمان ئەم داواکارییانە بەھەند وەرگرن:
١-لێپێچینەوەی تووند و سزای یاسایی ھەموو ئەو کەس و لایەنانەی کە بە ئەنقەست دژی ھۆشیاریی خەڵکن و بە ھەڵسوکەوتەکانیان دەبنە ھۆکارێک بۆ خولقاندنی ئافات و کارەسات.
٢-ھەموو کۆبوونەوەیەکی شوێنە گشتییەکان بەتایبەت ناو بازاڕەکان، قەدەغەبکرێت و سەرپێچیکار سزای یاسایی تووند بدرێت.
٣-گەشت و سەیران لە کۆمەڵگە گەشتیارییەکان و سەیرانگە داخراوەکان قەدەغە بکرێت و لێپێچینەوەی تووند لەگەڵ ئەوانە بکرێت کە پابەند نابن.
٤-ئەم ماوەیە ھەموو ئاھەنگ و پرسە و بۆنەیەک قەدەغە بکرێت.
٥-قەدەغەکردنی ھاتووچۆی نێوان ھەرێم لەگەڵ ناوەڕاست و باشووری عێڕاق، تەنھا بۆ بازرگانیی پێویست نەبێت، ھاتووچۆ ڕابگیرێت.
ھەماھەنگیی و بەدەمەوە ھاتنتان، ھۆکارێکی سەرەکیی ڕێگریی کردنە لە بڵاوبوونەوەی زیاتری نەخۆشییەکە، خوانەخواستە با کوردستانیش وەک ئێران و ئیتاڵیای بەسەر نەیەت.
بەشێک لە پزیشکانی کوردستان
