سەرۆکوەزیرانی عێراق رایگەیاند، دەبێت لە رۆژی 20ـی 10 هەڵبژاردنێکی پاک و بێگەرد لە هەرێمی کوردستان بەڕێوەبچێت، ئەوەش بۆ هێنانەدیی خواستی هاوڵاتییانی هەرێمی کوردستان.
محەمەد شیاع سودانی سەرۆکوەزیرانی عێراق لەگەڵ کۆمسیۆنی باڵای سەربەخۆی هەڵبژاردنەکانی عێراقدا کۆبووەوە و لە کۆبوونەوەکەدا رایگەیاند، دەبێت بەڕێوەچوونی هەڵبژاردنی پەرلەمانی کوردستان پڕۆسەیەکی پاک و بێگەر بێت.
ئاماژەی بەوەشکرد، دەبێت پارێزگاری لە دەنگی دەنگدەرانی هەرێم بکرێت و هەموو رێکارە پێویستەکان ئەنجامبدرێت بۆ بەڕێوەچوونی ئەو پڕۆسە دیموکراسییە گرنگە.
سودانی وتیشی، پشتگیریی حکومەت دەکەن لە بەڕێوەبردنی هەڵبژاردندا و هەموو کەرستە پێویستەکانی بەڕێوەبردنی هەڵبژاردن دابینکراون.
سەرۆکوەزیرانی عێراق باسی لەوەشکرد، پێویستە کارمەندانی کۆمسیۆن و سەرپەرشتیاران بەجۆرێک ئەرکەکەیان بەڕێوەببەن، کە دڵنیایی بدەنە دەنگدەران لە پارێزراوی دەنگەکانیان.
بڕیارە رۆژی 20ـی ئەم مانگە هەڵبژاردنى خولى شەشەمى پەرلەمانى کوردستان بەڕێوەبچێت و یەکەمجاریشە کۆمسیۆنى عێراق سەرپەرشتیى هەڵبژاردنى پەرلەمانى کوردستان دەکات. هەڵبژاردنەکەش لەلایەن ئەمریکا و کۆمەڵگەی نێودەوڵەتییەوە بە چڕی چاودێریی دەکرێت.
