سه‌رۆكى تیمى رۆژنامه‌وانى كۆمسیۆنى باڵاى سه‌ربه‌خۆى هه‌ڵبژاردنه‌كانى عێراق راگه‌یاند، نووسراومان بۆ سه‌رۆكایه‌تى هه‌رێمى كوردستان كردووه كه ناتوانین له رۆژى 25ى شوباتى 2024دا هه‌ڵبژاردنى په‌رله‌مانى كوردستان به‌ڕێوه‌به‌رین.
به‌پێى فه‌رمانى هه‌رێمى كه له‌لایه‌ن نێچیرڤان بارزانى، سه‌رۆكى هه‌رێمى كوردستان ده‌ركراوه، بڕیاربوو له رۆژى 25ى شوباتى 2024 هه‌ڵبژاردنى په‌رله‌مانى كوردستان به‌ڕێوه‌بچێت.
ئێواره‌ى ئه‌مڕۆ چوارشه‌ممه 3ى كانونى دووه‌م، عیماد جه‌میل، سه‌رۆكى تیمى رۆژنامه‌وانى كۆمسیۆنى باڵاى سه‌ربه‌خۆى هه‌ڵبژاردنه‌كانى عێراق رایگه‌یاند، “نووسراومان بۆ سه‌رۆكایه‌تى هه‌رێمى كوردستان كردووه كه ناتوانین له رۆژى 25ى شوباتى 2024دا هه‌ڵبژاردنى په‌رله‌مانى كوردستان به‌ڕێوه‌به‌رین”.
هه‌ر له‌وباره‌یه‌وه، رۆژى سێشه‌ممه 27ى كانونى یه‌كه‌م، داود سلێمان، بەڕێوەبەرى رێوشوێنەکان و مەشق لە کۆمسیۆنى باڵاى سەربەخۆى هەڵبژاردنەکانى عێراق رایگەیاند، “بەهۆى تێکچوونى خشتەى کارى کۆمیسیۆن و دواکەوتنى بڕیارى دادگەى باڵاى فیدراڵی لەسەر یاساى هەڵبژاردنى پەرلەمانى کوردستان، هەڵبژاردنەکە لەو وادەیە دوادەکەوێت کە بۆى دیاریکراوە”.
له‌باره‌ى ئه‌وه‌ى كه‌ى ئاماده ده‌بن بۆ به‌ڕێوه‌بردنى هه‌ڵبژارنه‌كه؟ داود سلێمان وتیشى: “ئەنجوومەنى کۆمیسیاران بۆ گۆڕانکاریکردن لە خشتەى ئەنجامدانى بۆ ئەو هەڵبژاردنە کۆدەبێتەوە”.
به وته‌ى بەڕێوەبەرى رێوشوێنەکان و مەشق لە کۆمسیۆنى باڵاى سەربەخۆى هەڵبژاردنەکانى عێراق، “كۆمسیۆن كاتى پێویستى له‌به‌رده‌ستدا نییه بۆ به‌ڕێوه‌بردنى هه‌ڵبژاردنى په‌رله‌مانى كوردستان”.
قسه‌كانى ئه‌و به‌رپرسه‌ى كۆمسیۆنى باڵاى هه‌ڵبژاردنه‌كانى عێراق له‌كاتێكدایه، كه پاشنیوه‌ڕۆى 27ى كانونى یه‌كه‌م ، دادگاى فیدراڵى عێراق بۆ جارى حه‌وته‌م بڕیاردانى له‌سه‌ر یاساى هه‌ڵبژاردنى په‌رله‌مانى كوردستان و پرسى كورسى كۆتاكان دواخست بۆ 21ى كانونى دووه‌مى 2024.
