دەستەی دەستپاکی (نەزاهە)ی عێراق دەستبەسەرداگرتنی بڕێکی زۆر پارەی نەقد و تاپۆی چەندین موڵکی لە ماڵی بەرپرسێکی پێشووی پارێزگای سەڵاحەدین ڕاگەیاند، کە لە چوارچێوەی کەیسی بەفیڕۆدانی سامانی گشتیدا تێوەگلاوە.
ئۆپەراسیۆنی دەستپاکی و دەستبەسەرداگرتنی سامانەکان
ئەمڕۆ سێشەممە ٢٨ی تەممووزی ٢٠٢٦، دەستەی دەستپاکی (نەزاهە)ی عێراق لە ڕاگەیەندراوێکی فەرمیدا ئاشکرای کرد، لە ئەنجامی ئۆپەراسیۆنێکی تایبەتدا بۆ سەر ماڵی بەڕێوەبەری پێشووی ژمێریاریی پارێزگای سەڵاحەدین، توانراوە دەست بەسەر بڕی دوو ملیار و ٥٠٠ ملیۆن دیناری عێراقیدا بگیرێت.
بەپێی ڕاگەیەندراوەکەی دەستەی دەستپاکی، جگە لەو بڕە پارە نەقدییە، لە هەمان ماڵدا تاپۆی فەرمیی شەش خانووی نیشتەجێبوون دۆزراوەتەوە و دەستی بەسەردا گیراوە، کە تەواویان بە ناوی هاوسەری ئەو بەرپرسەوە تۆمار کرابوون.
هۆکاری دەستگیرکردن و شێوازی گەندەڵییەکە
دەستەکە ڕوونیشی کردووەتەوە کە پاش کۆکردنەوەی بەڵگەی پێویست، بەڕێوەبەری پێشووی ژمێریاریی پارێزگای سەڵاحەدین بەپێی ماددەی ٣٤٠ لە یاسای سزادانی عێراقی دەستگیر کراوە. دەستگیرکردنەکە لە چوارچێوەی لێکۆڵینەوەیە لە دۆسیەیەک کە پەیوەندیدارە بە ڕێکخستن و خەرجکردنی چەکی بانکی لە بانکی ڕافیدەین بە ناوی خەرجکردنی شایستە و جیاوازیی مووچەی فەرمانبەرانی پارێزگاکە، بە جۆرێک کە بۆ دزینی پارەکە مامەڵەی وەهمی و وەسڵی خەیاڵییان بەکارهێناوە.
دۆزینەوەی ئەم بڕە پارە و موڵکە زۆرە لە ماڵی بەڕێوەبەرێکی بەشی ژمێریاریی پارێزگایەکدا، جارێکی دیکە شۆک و نیگەرانیی لای هاووڵاتییانی عێراق دروستکردووەتەوە و پرسیاری ئەوە دەکەن کە ئەگەر ئاستی گەندەڵی لەلای بەرپرسە بچووکەکان بەم شێوەیە بێت، دەبێت سەرکردە و بەرپرسە باڵاکان چ بڕە سامانێکی گشتییان بۆ خۆیان بردبێت.
باسک نێت
