بۆیەكەم جاری لە(2003) داهاتە نانەوتیەكان عێراق (12%) بودجەی گشتی پێكدەهێنێت
باسک نێت
داهاتە نانەوتیەكانی عێراق لە (9) مانگی یەكەمی ساڵی (2024)دا گەشەیەكی گەورەی كردووەو رێژەكەی گەیشتووەتە (198%)، بەوەش گەیشتووەتە (12.3%) كۆی داهاتەكانی دەوڵەتی عێراق.
مەنار عوبەیدی، سەرۆكی دامەزراوەی “عێراقی ئایندە” بۆ راوێژكارییە ئابورییەكان دەڵێت: كۆی داهاتە نانەوتیەكانی عێراق لەو ماوەیەدا گەیشتووەتە (14) تریلیۆن، لەكاتێكدا بڕەكەی لە هەمان ماوەی ساڵی (2023)دا لە سنوری (4) تریلیۆن و (700) ملیار دیناردا بووە، سەرەڕای دابەزینی بەهای داهاتەكانی باج لەسەر هێنانە ناوەوەو سامانەكان بە رێژەی (17%) بەڵام بەرزكردنەوەی رێژەی باج لەسەر كەرەستە بە رێژەی (275%) و بەرزكردنەوەی پشكی بودجە لە قازانجی كەرتی گشتی بە رێژەی (243%)بەشداربووە لەو زیادكردنە گەورەیە.
بۆ یەكەمجار لە ساڵی (2003)وە، داهاتە نانەوتیەكان رێژەی (12%) كۆی داهاتەكانی پێكهێناوەو رێژەی بەشداری نەوت بۆ (88%)ی كۆی داهاتەكان دابەزیووە.
كۆی بەهای داهاتەكانی تا مانگی ئەیلولی (2024) گەیشتووەتە (114) تریلیۆن دینار بە بەرزبونەوەی رێژەی (19%) بە بەراورد بە هەمان ماوە لە ساڵی رابردوو، كە بەهاكەی (95.85) تریلیۆن دینار بووە.
زیادبونی داهاتە نانەوتیەكان دەگەڕێتەوە بۆ ئەو چاكسازییانەی كە لەسەر ئاستی باج و گومرگ كراوە، لەگەڵ هاندانی كۆمپانیا گشتییە قازانجویستەكان بۆ زیادكردنی بەشدارییان لە داهاتە حكومیەكان ، پێشبنیش دەكرێت داهاتە نانەوتیەكان لە ساڵی (2024)دا بگاتە (18) تریلیۆن دینار عێراقی، سەرەڕای بەرزبونەوەی ئەو ژمارەیە بەڵام هێشتا لەو ژمارەیە دورە كە پلانی بۆ دانراوە لە بودجەداو لە سنوری (28) تریلیۆن دینارە، بەڵام زیادكردنی داهاتەكان رەنگدانەوەی سەركەوتوویی ئەو چاكسازییانە كە لەبواری پارە كۆكردنەوەو كاركردن بۆ زیادكردنی پارەدان لەڕێی پەنجەرە ئەلەكترۆنییەكانەوە كراوە.
