توركیا لە رێككەوتنی نوێدا داوای زیادكردنی كرێی تێپەڕبونی نەوتی عێراق دەكات
باسک نێت
روانگەی “ئێکۆ عێراق” کە تایبەتە بە کاروباری ئابوری ئەمڕۆ شەممە ئاشکرایکرد: دانوستانی بەرایی لە نێوان عێراق و تورکیا سەبارەت بە رێککەوتنێکی نوێ بۆ هەناردەکردنی نەوت لە ڕێگەی بەندەری جەیهانەوە بەڕێوە دەچێت، تورکیا داوایكردووە بۆ رسوماتی هەناردەکردنی هەر بەرمیلێک نەوت بۆ دوو دۆلار و نیو زیاد بكرێت، لە کاتێکدا پێشتر نرخی یەک دۆلار بۆ یەک دۆلار بۆ دۆلارونیوێك بووە.
عەلی ناجی، ئەندامی روانگەكە، بە ئاژانسی “شەفەق نیوز”ی راگەیاندووە: عێراق رۆژانە نزیکەی (500)هەزار بەرمیل لە ڕێگەی بۆری نەوتەوە هەناردەی بەندەری جەیهانی تورکیا دەکرد، کە لە نێوان کێڵگەکانی هەرێمی کوردستان و کەرکوک دابەش دەکرا، بەر لەوەی رابگیرێت.
ئاماژەی بەوەشکردووە: ئەو زانیارییە سەرەتاییانەی دەست روانگەكەيان کەوتووە ئاماژە بەوە دەکەن، تورکیا لە ئێستادا داوای زیادکردنی نرخی رسوماتی تێپەڕبون دەكات بەجۆرێك بۆ هەر بەرمیلێک (2.5) دۆلار بێت.
رونیشكردووەتەوە: گفتوگۆکان هێشتا لە قۆناغی سەرەتاییدایەو نەگەیشتوونەتە ئاستی دانوستانی فەرمی یان داڕشتنی رێککەوتنێکی نوێ.
ناجی ئاماژەی بەوەشداوە: بۆری کەرکوک-جەیهان توانای هەناردەکردنی رۆژانەی یەک ملیۆن بەرمیل هەیە، ئەگەر بەتەواوی توانایەوە کاربکات.
