دارایی و ئابووری هەرێم رایگەیاند، توانرا زیاتر لە پێنج هەزار خانەنشینی نوێ داخڵی لیستی مووچە بکرێنەوە و ناوەکانیان ڕەوانەی وەزارەتی دارایی حکومەتی فیدراڵ کراوە، تا لەگەڵ مووچەی مانگی ئایار مووچەی مانگەکانی ڕابردووشیان بۆ خەرج بکرێتەوە.
ئەمڕۆ دووشەممە، 26-5-2025، وەزارەتی دارایی و ئابووری هەرێم، لە راگەیەندراوێکدا رایگەیاند، لە چوارچێوەی هەوڵەکانی وەزارەتی دارایی و ئابووری و لەسەر ڕاسپاردەی وەزیر، چەندین ڕێکار و هەنگاوی پێویست بۆ خێرا ڕاییکردنی مامەڵەی خانەنشینان گیراونەتە بەر.
راشیگەیاند، داوا لەسەرجەم وەزارەت و فەرمانگەکانی نەبەستراو بە وەزارەت کراوە کە لەسەر بنەمای فۆڕمی زانیاری بەڕێوەبەرایەتی گشتی خانەنشین، دۆسیەی ئەو فەرمانبەرانە رەوانە بکەن، کە تەمەنی یاساییان لە خزمەت تەواوبووە و بەپێی یاسای خانەنشینی یەکگرتوی عێراق رەوانەی خانەنشینی دەکرێن.
ئاشکراشیکرد، لە ئەنجامی ئەو ڕێکارانەی لە دوو مانگی ڕابردوو گیرانەبەر توانراوە بۆ لیستی مووچەی مانگی ئایار (5261) پێنج هەزار و دووسەد و شەست و یەک، خانەنشینی نوێ داخڵی لیستی مووچە بکرێنەوە و ناوەکانیان ڕەوانەی وەزارەتی دارایی حکومەتی فیدراڵ کراوە تا لەگەڵ مووچەی مانگی ئایار مووچەی مانگەکانی ڕابردووشیان بۆ خەرج بکرێتەوە، بە پێی ئەو تەرخانەی لە ساڵی 2025 بۆیان جێگیرکراوە.
