نوسەران

بزووتنەوەی ئیسلامیی كۆنگرەی (١٢) دەبەستێت گۆڕانكاریی گەورە ڕوودەدات

بزووتنەوەی ئیسلامیی
(٢٠٢٢/٢/٥)، كۆنگرەی (١٢) دەبەستێت
گۆڕانكاریی گەورە ڕوودەدات

سەرباری دواكەوتنی كۆنگرەی ئاسایی بزووتنەوەی ئیسلامیی بە (١ ساڵ و ٥ مانگ و ٩ ڕۆژ)، وا بڕیارە ڕۆژی (٢٠٢٢/٢/٥) لە شاری ھەولێر، بە ئامادەبوونی (٤٠٠) ئەندام، دوانزەھەمین كۆنگرەی خۆی ببەستێت.

بە پێی پەیڕەوی ناوخۆی بزووتنەوەی ئیسلامیی، ھەر چوار ساڵ جارێك دەبێت كۆنگرە ببەسترێت، بەم پێیە ٢٠٢٠/٧/٢٥ دەبوایە دوانزەھەمین كۆنگرە ببەسترایە و ئەندامانی كۆنگرە ئەبدێتی پەیڕەو و ئۆرگان و سیاسەت و ستراتیژی حیزبەكەیان بكردایە.

لەوەھا ڕەوش و قۆناغێكدا، لە گرنگ گرنگترە بزووتنەوەی ئیسلامیی وەك حیزبێكی مەبدەئیی و میتۆدیی و مەنھەجیی، بە پەیڕەو كاربكات و پرەنسیپی سەرەكیی خۆی كە قورئان و سوننەتە، بكاتە ڕێبەر و خۆی لەم نائۆرگانیی و خزانە دەربازبكات و سەركردایەتییەكی جۆریی و ئیرادەخواز ھەڵبژێرێت تا لەم ھەلومەرجەدا، پرس و پرۆسە و پێھەنگاوەكانی دنیای نوێ ھەڵسەنگێنێت و میكانیزم و گوتاری پڕ بە بەر، بە باڵایاندا بدورێت.

خۆشبەختانەش لیژنەی باڵای ئامادەكاریی كۆنگرەی دوانزە، لە ئامادەكاریی تەواودایە و وا بڕیاریشە لەم كۆنگرەیەدا دەست ببرێت بۆ زۆر گۆڕانكاریی، لەوانە:
ـ گۆڕینی ڕابەری گشتیی
ـ ھەڵبژاردنی سەركردایەتییەكی نوێ
ـ ھەمواری چەندین ماددە و بڕگەی پەیڕەو
ـ چاوخشاندنەوە بە گوتار و ستراتیژ و پەیوەندییەكان
ـ دەستكاریی ھەیكەل
ـ گۆڕینی لۆگۆ
ـ بەشداریی بەشێك ئەو سەركردە و كادر و دڵسۆزانەی بە ھۆكاری جیاواز دانیشتوون و دووركەوتوونەتەوە لە كاری حیزبیی، لەگەڵ بەشداریی ھێڵی گۆڕانكاریی

ئەوەی لای من گرنگە:
ـ لەو بەروارەی بڕیاردراوە، كە (٢٠٢٢/٢/٥)، كۆنگرە ببەسترێت و دوانەكەوێت
ـ ستراتیژ و گوتاری بزووتنەوە گۆڕانی بەسەردا بێت بە پێی ھەلومەرجی دنیای نوێ، بە ڕەچاوكردنی پاراستنی پرەنسیپی (قورئان و سوننەت)
ـ ڕابەرێكی نوێ ھەڵبژێردرێت، ئەمە لە كاتێكدا ڕابەری ئێستا جەنابی (م. عیرفان عەلی عەبدولعەزیز) دوو خولە ڕابەرە و بە پێی پەیرەو ناتوانێت خۆی بەربژێر بكاتەوە، خۆیشی ڕایگەیاندووە كە بەربژێر نابێت
ـ ھەڵبژاردنی سەركردایەتییەكی نوێی ھاوسەنگ و بەھێز
ـ فۆكس خستنەسەر سێ پایەی گرنگ (گەڕانەوە بۆ ڕەسەنایەتیی، داراییەكی تۆكمە، میدیایەكی جۆریی)

بۆ ئەم مەبەستەش پاكێجێكی شەش خاڵییم ئامادەكردووە بۆ لیژنەی باڵای ئامادەكاریی كۆنگرەی دوانزە.

ئاری عەبدولەتیف

لێدوان بنوسە لەڕیگای فەیسبووکەوە

بابەتی دیكە

Close