نوسەران

حوكمڕانییەكی خراپ دۆخی كورد تا كەی ئاوا دەبێت؟

حوكمڕانییەكی خراپ
دۆخی كورد تا كەی ئاوا دەبێت؟

ئاری عەبدولەتیف

لە (٢٩) ساڵ ئەزمونی حوكمڕانیی و (٥) خولی پەرلەمان و (٩) كابینەی حكومەتدا، دۆخی خەڵكی كورد لەم بەشەی باشور و قەوارەیەی ھەرێمدا، پاسیڤ و خراپە و ھەمووی ڕەخنە دەگرێ بە دەسەڵات و ئۆپۆزسیۆن و ئاسۆی بەدیلێك دیار نییە تا خەڵك دڵی پێی خۆش بێت.
باشە كەی كورد ژیان بكات؟ كەی دەستپێبكەین وەك مرۆڤ بژین و وەك نەتەوەكانی دونیا ماف و ئەلفوبێی خۆشژیانیمان ھەبێت؟
لە ڕاستیدا دەیان ئاریشە و گرێی گەورە ھەن كە بوونەتە فاكتەری ئەم دواكەوتوویی و فەسادخانەیە و كەسیش لە پلەی بەرپرسیارێتیدا خۆی تێوە ناگلێنێ، كێشە ناشرینەكان لەگەڵ بەغدا و بابەتی دەستوور و نەوت و پێشمەرگە و بودجە و مووچە و نەبوونی خزمەتگوزاریی و ململانێی حیزبەكان و بەتاڵانبردنی سامانی نیشتیمانی و دوو ئیدارەیی و دانەنانی كەسی شیاو بۆ شوێنی شیاو و چەندین ھۆكاری نێگەتیڤی تر، بوونەتە گەنە بەسەر جەستەی ئەم وڵاتەوە.
لە بانگەشەی حوكمێكی ڕەشید و حكومەتێكی تەكنۆكرات و دەسەڵاتێكی دامەزراوەیی و پڕوپاگەندەی ھەزاربارەی خزمەتگوزاریی و ئارامیی و ژیانی شایستە و ھەلی كار و چاكسازیی و بڕینی دەستی خیانەت و گەندەڵیی، گەشتوینەتە حكومەتێكی پینەوپەڕۆ و كاربەڕێكەر بە زەحمەت و بێمتمانەیی و ڕوخانی پردی نێوان ھاوڵاتیی و حكومەت، كەچی ھێشتا سەیر لەوەدایە ئەم دەسەڵاتە ھەر بە پێوەیە و واز ناھێنێت و ڕۆژ بە ڕۆژیش بە ڕۆژی ڕوناك وەك حكومەتێكی بەھێز و بنكەفراوان و خزمەتگوزار خۆی نمایش دەكات و پرۆسەی گەمژاندنیش تا بێت ئەبدێت دەكەنەوە.
من سەیرم لێدێت لەم قۆناغەدا كە تازەبە تازە مل كەچدەكەنەوە بۆ بەغدا و ھەر ڕۆژە و سیناریۆیەكی بێتامی مەكشوف ڕێكدەخەن بۆ سەرقاڵكردنی خەڵك و ناشەفافیەتی داھات تا بێ قوڵتر دەكەنەوە و ناڕێكی و دزیی لە سامانی گشتیدا تا بێ قایمتر دەبێتەوە و موچە مانگ بە مانگ دوادەكەوێت، یەك حیزبی بەشدار لەم حكومەتە و یەك وەزیر و یەك پەرلەمانتار و یەك لێپرسراو لە پایەكانی دەسەڵات نابینیتەوە ھەڵوێستی گەورەی نیشتیمانی ھەبێت و لانی كەم دەستلەكار بكێشێتەوە.
باشە یەك پرسیار و بەس:
دۆخی ھەرێم و خەڵكی كوردستان تاكەی ئاوا بێت، ئەم پرسیارە نابێت بێ وەڵام بمێنێتەوە ئەگەر وەڵامەكەشی بەم جۆرە بێت:
بەڕێز ئاری عەبدولەتیف دۆخی ھەرێم و خەڵكی كوردستان یان بۆ ھەمیشە وادەبێت یان نزیكەی پەنجا ساڵی تر باش دەبێت!

لێدوان بنوسە لەڕیگای فەیسبووکەوە

بابەتی دیكە

Close