باسک نێت
کۆمسیۆنی عێراق ڕایگەیاند، میلیۆنێک و 292 هەزار و 45 دەنگدەر کارتی بایۆمەترییان بۆ هەڵبژاردنی داهاتووی پەرلەمانی عێراق نوێ کردووەتەوە، داواش دەکات، ئەو دەنگدەرانەی کێشە لە کارتەکانییان هەیە سەردانی بنەکەکان بکەن.
ئەمڕۆ دووشەممە، 19-05-2025، کۆمسیۆنی باڵای سەربەخۆی هەڵبژاردنەکانی عێراق، لە ڕاگەیەندراوێکدا ڕایگەیاند، میلیۆنێک و 292 هەزار و 45 دەنگدەر کارتی بایۆمەترییان بۆ هەڵبژاردنی داهاتووی پەرلەمانی عێراق نوێ کردووەتەوە.
ڕاشیگەیاند، لە پارێزگای نەینەوا زیاتر لە ناوچەکانی دیکە هاوڵاتییان سەردانی بنکەکانی تۆماری دەنگدەرانیان کردووە و کارتەکانییان نوێ کردووەتەوە، دوای ئەویش ناوچەکانی ڕەسافە و کەرخی بەغدا دێن، هەروەها لە پارێزگای هەولێریش 95 هەزار و 417 دەنگدەر کارتەکانییان نوێ کردووەتەوە.
کۆمسیۆنی باڵای سەربەخۆی هەڵبژاردنەکانی عێراق، داوا دەکات، ئەو دەنگدەرانەی کێشە لە کارتەکانیان هەیە سەردانی یەکێک لەو هەزار و 79 بنکەی کۆمیسیۆن بکەن، کە بۆ ڕاییکردنی مامەڵەکان تاوەکو پێنج ڕۆژی دیکە کراوە دەبن.
ئەمەش لە کاتێکدایە، ئەنجوومەنى وەزیرانى عێراق 11ـى تشرینى دووەمى 2025ـى دیاری کردووە وەک ڕۆژى هەڵبژاردنى پەرلەمان.
