موقتەدا سەدر داوای گردبوونەوە لە سەرجەم زانکۆ و قوتابخانەکانی عێراق دەکات بۆ پشتگیریی حیجاب
باسک نێت
موقتەدا سەدر، ڕێبەری ڕەوتی سەدر داوای کرد ڕۆژی پێنجشەممەی داهاتوو لە سەرجەم زانکۆ، پەیمانگە و قوتابخانەکانی عێراقدا گردبوونەوەیەکی ناڕەزایەتیی یەکگرتوو دژی بڕیاری قەدەغەکردنی باڵاپۆشی (حیجاب) لە هەندێک وڵاتی جیهاندا بەڕێوەبچێت.
ئەمڕۆ یەکشەممە، 18ـی 10ـی 2026، بەپێی پەیامێکی ڕێبەری ڕەوتی سەدر، داوا کراوە لە بەیانیی ڕۆژی پێنجشەممەی داهاتوودا، لە یەک کاتدا لە سەرجەم ناوەندەکانی خوێندن لە سەرانسەری عێراق ناڕەزایەتییەکی هێمنانە و یەکگرتوو دژی هەر هەوڵێک بۆ قەدەغەکردنی حیجاب دەرببڕدرێت.
سەبارەت بە شێوازی بەڕێوەچوونی چالاکییەکەش، چەند مەرج و ڕێنمایییەک دیاریکراون؛ گردبوونەوەکە تەنها بۆ ماوەی چەند خولەکێک لەناو حەوشەی ناوەندەکانی خوێندندا دەبێت بە جۆرێک کە پرۆسەی خوێندن و دەوام پەک نەخات، هاوکات بە تەواوی قەدەغەیە لە کاتی گردبوونەوەکەدا جگە لە ئاڵای فەرمیی عێراق، هیچ وێنە یان ئاڵایەکی حزبی و لایەنگری بەرزبکرێتەوە.
