ناوەندی هاوبەشی ئەمنیی لەنێوان توركیا وعێراق دەكرێتەوە
باسک نێت
وەزارەتی بەرگریی توركیا بڵاویكردەوە لە ڕێگەی ئەو یاداشتنامە لێكتێگەیشتنەی سەبارەت بە هاریكاریی ئەمنیی لە ١٥ی ئابدا لەنێوان توركیا و عێراقدا واژوو كرا ‘ناوەندی هاوبەشی هەماهەنگیی ئەمنیی’ لە بەغدا دادەمەزرێت كە كارمەندانی تورك و عێراقی بەیەكەوە كاری تێدا دەكەن و تیایدا زانیاری هەواڵگریی بەشدەكرێت و پلانی ستراتیجی سەربازی دادەنرێت.
ئەدمیراڵ زەكی ئاكتورك ڕاوێژكاری پەیوەندییەكان و ڕاگەیاندن لە وەزارەتی بەرگریی توركیا ڕایگەیاند: وەزیرەكەمان كە بەشداری لە كۆبوونەوەی ‘میكانیزمی باڵای ئەمنییدا’ كرد لە نێوان وڵاتەكەمان و عێراقدا كە لە ١٥ی ئابدا چوارهەمینی لە ئەنقەرە سازكرا، لەگەڵ وەزیری بەرگریی عێراقدا ‘یاداشتنامەی لێكتێگەیشتنی لەبارەی هاریكاریی ئەمنیی و بەرەنگاربوونەوەی تیرۆر’ واژووكرد.
وتیشی: لە ڕێگەی ئەو ڕێككەوتنەوە ‘ناوەندی هاوبەشی هەماهەنگیی ئەمنیی’ لە بەغدا دادەمەزرێت كە كارمەندانی تورك و عێراقی بەیەكەوە كاری تێدا دەكەن و تیایدا زانیاری هەواڵگریی بەشدەكرێت و پلانی ستراتیجی سەربازی دادەنرێت، هەروەها لە نێوان هێزەكانماندا لە گۆڕەپانەكەدا هەماهەنگیی دەكرێت بۆ وەستانەوە دژی ئەو ڕێكخراوە تیرۆریستییانەی مەترسی لەسەر هەردوو وڵات دروست دەكەن.
ئەوەشی خستەڕوو: پلان دادەنرێت لە ڕێگەی ناوەندی هاریكاریی و مەشقی هاوبەش كە هەر لە ڕێگەی ئەم ڕێككەوتنەوە لە بەعشیقە دروست دەكرێت مەشق بە هێزە ئەمنییەكانی عێراق بكرێت بە ئامانجی زیادكردنی تواناكان لە ڕووی ئەمنیی و بەرەنگاربوونەوەی تیرۆر و بەشكردنی ئەزموون لەو بارەیەوەو لە قۆناغی كۆتاییشدا تیرۆر كە مەترسی لەسەر خەڵكی هەردوو وڵات دروست كردووە ئیدی لەناودەچێت و لەوە دەردەچێت ببێت بە كێشە لە ناوچەكەدا”.
