کۆمپانیای گوڵف کیستۆن مانگی ڕابردوو ڕۆژانە ٤٨ هەزار بەرمیل نەوتی فرۆشتووە
باسک نێت
کۆمپانیای گوڵف کیستۆن کە ئەندامە لە کۆمەڵەی پیشەسازی نەوتی کوردستان ”ئەپیکۆر” و کێڵگەی شێخان بەڕێوە دەبات. له ڕاپۆرتێکدا زانیاری لەسەر بەرهەمهێنانی نەوت و فرۆشتنی نەوت لە کێڵگەکە بڵاو دەکاتەوە.
بۆ یەکەمجارە کۆمپانیایەکی بەرهەمهێنی نەوت لە هەرێم لە ڕاپۆرتی فەڕمی خۆیدا، دان بە فرۆشتنی نەوت بنێت لە دوای ڕاگرتنی هەناردەی نەوتی هەرێم لە ئازاری ساڵی ڕابردوو.
گوڵف کیستۆن، لە ڕاپۆرتەکەیدا ئاماژەی بەوەداوە نەوتی بەرهەم هاتوو لە کێڵگەکە دەفرۆشنە کڕیارانی ناوخۆی هەرێم و هەر بەرمیلێک نەوت دەدەنە ۲٨ دۆلار.
کۆمپانیاکە ڕایگەیاندووە مانگی ڕابردوو تێکڕا ڕۆژانە ٤٨ هەزار و ۲۰۰ بەرمیل نەوتیان لە کێڵگەکە فرۆشتووە. ئەم مانگە بەهۆی پشووی جەژن بەرهەمهێنان تێکڕا کەمتر بووە و دابەزیوە بۆ ٤۰ هەزار و ٥۰۰ بەرمیل.
نەوتی کێڵگەکە بەکۆمپانیای ناوخۆی دەفرۆشرێت و پێشەکی پارەی نەوت وەردەگیرێت و نەوتەکە بەتانکەر بۆ پاڵاوگە ناوخۆییەکان و وڵاتانی ئێران و تورکیا دەگوازرێتەوە.
کۆمپانیای گوڵف کیستۆن مانگانە پتر لە ۳۰ ملیۆن دۆلاری لە فرۆشتنی نەوت دەست دەکەوێت و تێچووی گواستنەوەی نەوت دەکەوێتە سەر کڕیاران.
نەوتی کێڵگەی شێخان نەوتی جۆری قورسە و نرخەکەی لەچاو بازاڕی جیهانی ۱٥ دۆلار کەمترە لە نرخی نەوتی برێنت، بەڵام لەناو هەرێمدا بە ٥٥ دۆلار لە خوار نرخی نەوتی برێنتەوە دەفرۆشرێت.
