باسک نێت
وەزارەتی تەندروستیی غەززە ئاشکرایکردووە، لە 24 کاتژمێری ڕابردوودا، ژمارەی گیانلەدەستدان بەهۆی هێرشەکانی ئیسرائیلەوە لە غەززە 241 کەس زیادیکردووە و بەمەش لە دەستپێکی هێرشەکانەوە تائێستا، 20 هەزار و 915 کەس گیانیانلەدەستداوە، هاوکات 54 هەزار کەسیش برینداربوون.
ئەشرەف قودرە، وتەبێژی وەزارەتی تەندروستی لە کەرتی غەززە، لە کۆنگرەیەکی ڕۆژنامەوانییدا دوایین ئاماری لەبارەی قوربانیانی ھێرش و بۆردومانەکانی ئیسرائیل بۆسەر کەرتی غەززە خستەڕوو لە میانی 24 کاتژمێری ڕابردوودا.
ئاماژەی بەوەکردووە، سوپای ئیسرائیل، 18 کۆمەڵکوژی بەرامبەر بە فەڵەستینییەکان لە کەرتی غەززە ئەنجامداوە کە لە ئاکامدا، 241 کەس کوژراون و 382 دیکەش برینداربوون.
ئەوەش لەکاتێکدایە، لە 7ی مانگی تشرینی یەکەمەوە لە ئاکامی ھێرشەکانی ئیسرائیل بۆسەر کەرتی غەززە تا ئیستا، 20 ھەزار و 915 کەس کوژراون و ژمارەی بریندارەکانیش گەیشتووەتە، 54 ھەزار و 918 کەس.
