ڕاپۆرت
بێنازی کەسوکاری شەهیدان لە ئەستۆی ئەو کەسانەیە تەفرەقەیان دروستکرد.
تایبەت بە (باسک نێت)
ڕاپۆرتی: محەمەد ئاراس
-لە درێژەی دیدارەكانماندا پێمان باش بوو بەرێز عەبداللە وەرتێ ئەندامی مەكتەبی سیاسی و وتەبێژی بزووتنەوەی ئیسلامی بدوێنین سەبارەت بە شەهیدان و رۆژی شەهیدانی بزووتنەوە
-بزووتنەوەی ئیسلامی وەك هێزێكی كاریگەری دوینێ لە پێناو ئیسلام و خەڵكی كوردستان و پاراستنی گەشەی ئیسلامخوازیی سەدان شەهیدی بەخشیوە لەمڕوەوە بزووتنەوە شانازیی دەكات بە شكۆی شەهیدانی بەڵێنی داوە وێڕای درێژەدان بە كاروانەكەیان خزمەت بە نەوە و كەسوكاریان بكات و خوینی شەهیدانیش بكاتە مەشقی كار و خزمەتی زیاتر.
م.عەبدوڵا وەرتێ، لەم دیدارە تایبەتەی (باسك نێت) بەمشێوەیە وەڵامی پرسیارەكانی داینەوە.
-باسک نێت: پێگەی شەهیدانی بزووتنەوە لای ئێوە لە چ ئاستێكدایە.
- باشترین وتە سەبارەت بە شەهیدانمان ئەو وتەیەیە کە مامۆستا مەلا عوسمان فەرمووی شەهیدان نووری چاومان و وزەی بەردەوامی گیانمانن ٫ شەهیدان بە خوێن و گیانی خۆیان درەختی ئیسلام و بزووتنەوەی ئیسلامییان ئاوداوە، لە ساڵڕۆژی شەهیدانی بزووتنەوە بەڵێنمان تازە دەکەینەوە کە بەردەوام دەبین لەسەر ڕێبازی شەهیدان و درێژەدان بە کاروانی خەباتیان.
-باسک نێت: تا چەند توانیوتانە دڵی بنەماڵەی شەهیدان بدەنەوە؟بزووتنەوە چ ڕۆڵێكی داوە بە نەوە و ڕۆڵەكانی شەهیدان و ئایا لاتان لێ كردونەتەوە؟
- پێمان وایە کە ئەم کاروانە هەمیشە پێویستی بە قوربانیدان و گیان فیداییە لە پێناو ڕێبازی ئیسلام و میللەتەکەمان و خۆشمان بە کەمتەرخەم دەزانین بەرامبەر بە خانەوادەی سەربەرزی شەهیدەکانمان و حکومەتیش وەک پێویست بەدەم داخوازی خانەوادەی شەهیدەکانمانەوە نەهاتووەو تائێستاش مافە یاساییەکانیان دابین نەکراوە٫وە هەمیشە لە ئاستی خوێنی شەهیدەکانمان خۆمان بە شەرمەندە دەزانین، کەس و کار و نەوە و خانەوادەی شەهیدان دڵنیا دەکەین لە داهاتوودا بزووتنەوەی ئیسلامی کوردستان گرنگی و بایەخی زیاتر دەدات بەو بیروباوەڕەی کە شەهیدەکانمان لەپێناویدا گیانی خۆیان بەخت کردووە، گرنگیدان و بایەخدان بە ڕۆڵەو نەوەو کەسوکاریان ئەخەینە بەرنامەی کاری لەپێشینەی خۆمان و بە جدی کاریان لەسەر دەکەین بەشێوازێک کە ببێتە بوژانەوەی ژیان و گوزەرانی کەسوکاری شەهیدەکانمان و پێگەو ڕۆڵی شایستەیان پێبدرێت٫ بەشێکی بێنازی خانەوادەی شەهیدەکانمان دەخەینە ئەستۆی ئەو کەسو گروپانەی کە لە دوای راپەڕینەوە لێکترازانیان دروست کرد لە ڕێزەکانی بزووتنەوەی ئیسلامیی.