عێراقچی: ئێران هەم لە جەنگ و هەم لە دیپلۆماسیدا سەرکەوتنی بەدەستهێنا
باسک نێت
وەزیری دەرەوەی ئێران ڕایدەگەیەنێت خۆڕاگریی وڵاتەکەی وەڵامی هەڕەشەکانی ئەمریکای داوەتەوە و واشنتۆنی ناچار کردووە لە ماوەی کەمتر لە مانگێکدا هەڵوێستی بگۆڕێت و داوای دانوستان بکات.
گۆڕانکاری لە هەڵوێستی ئەمریکا و بەرگریی ئێران
ئەمڕۆ سێشەممە ١١ی ئابی ٢٠٢٦، عەباس عێراقچی، وەزیری دەرەوەی ئێران لە پەیامێکی ڤیدیۆییدا ڕایگەیاند، لە سەرەتای ئاڵۆزییەکاندا سەرۆکی ئەمریکا داوای خۆبەدەستدانی بێمەرجی لە ئێران دەکرد، بەڵام دوای تێپەڕبوونی نزیکەی ٢٠ ڕۆژ بەسەر ڕووداوەکاندا، هەمان ئەو لایەنە ناچار بوو داوای دانوستاندن بکات.
وەزیری دەرەوەی ئێران ئاماژەی بەوەش کرد کە هیچ لایەنێک پێشبینیی ئەوەی نەدەکرد کۆماری ئیسلامیی ئێران بتوانێت بەم شێوەیە لە بەرامبەر ئەمریکا و هاوپەیمانە ڕۆژئاوایی و هەرێمییەکانیدا خۆڕاگر بێت و پێگەی خۆی بپارێزێت.
سەرکەوتنی سەربازی و دیپلۆماسی
عەباس عێراقچی سەبارەت بە ڕووبەڕووبوونەوەکان جەختی کردەوە، گەلی ئێران توانای خۆی لە بەرگریکردن لە مافەکانی سەلماندووە. ئاشکراشی کرد کە ژمارەیەک لە بەرپرسانی نێودەوڵەتی ئاماژەیان بەوە داوە ئێران لە یەک کاتدا هەم لە گۆڕەپانی جەنگ و هەم لە بەرەی دیپلۆماسیدا سەرکەوتنی بەدەستهێناوە.
لە کۆتاییدا وەزیری دەرەوەی ئێران گوتی: “هێزە چەکدارەکانمان لە مەیدانی جەنگدا هێز و بوێریی خۆیان سەلماند و نەمانهێشت ژیانی ڕۆژانەی گەلەکەمان لە ژێر قورسترین بۆردومانەکاندا تووشی ئاستەنگ بێت.”
