لە ساڵیادی کۆچکردنیدا … ( ئەحمەد کاکە مەحمود ) نمونەی سەرکردەیەکی سیاسیی شەرعزانی هاوچەرخ
پ . د . سەعید عەلی محەمەد✍️باسک نێت
كۆمەڵگەی كوردی لە كوردستاندا كۆمەڵێكی زۆر لە زانایانی ئایینی و كەڵەپیاو و خەباتگێڕو تێكۆشەری نەتەوەیی مەزنی پێگەیاندووە ، هەر لە ( شێخ سەعیدی پیران ) و (سەعید نەورەسی ) و (قازي محەمەد) و (مەلا مصطفی بارزانی ) و (ئەحمدی موفتی زادە ) و (ناسری سوبحانی ) و (عەبدول كەریمی مودەریس) و (عوسمان عبدول عەزیز ) و (مه لا عەلی عبدول عەزیز ) و (مصطفی زەڵمی ) و دەیان و سەدانی تر كە هەر یەكێك لەوانە عیملاق و عەلەمداری سەردەمی خۆی بووە و نمونەی شوناسی ئیسلامیی و نەتەوەیی و هێمای ئەخلاق و سلوك و زوهدو عەدل و سیاسەت و بەگژداچوونی ستەم و زوڵم و نادادیی بووە!
یەكێك لەو كەسایەتییە زانستییە شەرعزانە ناودارانەی كە درێژە پێدەری هەمان ئەو كاروانە پیرۆزو گەورەیەیە : (مامۆستا مەلا ئەحمەد كاكە مەحمود )ه كە ساڵی 1950 لە گوندی یاڵانپێی ناوچەی هەورامان لەدایك بووە و ، لە ساڵی 1977 مۆڵەتی مەلایەتی وەرگرتووە و ، لە تەمەنی لاوێتییەوە دەستی بە نووسین كردووە و زیاتر لە (30) پەرتوك و دەست نووسی لە بوارە جیاجیاكاندا هەیە كە هەرە دیارترینییان تەفسیری قورئانی پیرۆزە كە تا ئێستا (6) جار چاپ كراوەتەوە!
بێگومان زۆرن ئەو مەلاو زانا ئایینیانەی كە لە كوردستاندا خزمەتی ئیسلام و حوجرە و زانستە شەرعییەكان و چارەسەری كێشە كۆمەڵایەتییەكانیان كردووە ، بەڵام ئەوەی كە ئەحمەد كاكە مەحمود لە ئەوان و زۆرێك لە زاناو كەڵە پیاوەكانی تری كۆمەڵگەی كوردەواریی جیا دەكاتەوە ئەوەیە : مامۆستا ئەحمەد جگە لەوەی مەلایەكی ناسراو و كەسایەتییەكی كۆمەڵایەتی و پیاوێكی ناوداری ناوچەی هەڵەبجە و هەورامان بووە ، لە هەمان كاتدا قەڵەم بەدەست و نوسەرێكی زیندو و فەقیهێك و شەرع زانێكی هاوچەرخ و ڕەمزێكی قیادیی و جیهادیی و حەرەكیی دیارو لەماوەی (30) ساڵی ڕابردوودا پێشڕەوی گەورەترین شۆڕشی سیاسیی ئيسلامیی و فیكریی و فیقهیی و عەقڵیی و ڕۆشنبیریی بووە لە هیزری جەماوەری ناوچەكە بە گشتی و گەنج و لاوان و ڕۆشنبیران بەتایبەتی!
بێگومان لە هەشتاكان و نەوەدەكانی سەدەی ڕابردوودا كۆمەڵێك دیاردە و ڕووداوی گەورەی سیاسیی و ئابووریی و كۆمەڵایەتی لە ساحەی سیاسی كوردستان و ناوچەكەدا ڕوویاندا ، هەر لە ڕوودانی شەڕی ئێران – عێراق و ، ڕووخانی یەكێتی سۆڤیەت و كۆتایی هاتنی تەوژمی شیوعییەت و ، بەگژداچوونەوەی زوڵم و ستەم و نادادی و ، زەرورەتی هاتنەكایەی حیزب و كاری ئیسلامیی و خەباتی چەكداریی و سەرهەڵدانی بیرۆكەی جیهاد و دەستەواژەی توندڕەوی و بیری دیموكراسی و چەندان بابەت و پرسی كۆمەڵایەتی تری جۆراوجۆر ، كە لەبەرانبەر ئەم شەپۆلە گۆڕانكارییانەدا مەعلومه ( ئەحمەد كاكە مەحمود) سوارچاكێكی ئازاو بەتواناو عیملاقێكی مەیدانی وەڵامدانەوە ى برسياره كان و بەدەمەوەچوون و چارەسەركردنی زۆربەی ئەو كێشە و بابەت و پرس و قەیران و گۆڕانكارییانە بوو!!
بێگومان لە مێژووی كوردایەتیدا زۆربوون ئەوانەی هەڵگری دروشمی كوردایەتی و ئازادیخوازیی و خەباتی نەتەوەیی و بەگژداچوونەوەی دیكتاتۆرییەت و سەندنەوەی مافە زەوتكراوەكانییان هەڵگرتبوو ، بەڵام جیاواز لەوان ئەگەر سەرنج بدەینە نووسین و بەرهەم و ووتارو فەتواو وێزگەكانی ژیانی ئەم كەسایەتییە گرنگە بۆمان دەردەكەوێ كە ئەو چ بایەخ و گرنگییەكي نەك تەنها بە نەتەوە و كوردایەتی ، بەڵكو بە سەرجەم پرسە هەستیارو بابەتە گەرماو گەرمەكانی ژیانی كۆمەڵگەی كوردی داوە ، هەر لە چەسپاندنی باوەڕو پەروەردەكردنی تاك و خێزان و پێگەیاندنی لاوان و هۆشیاركردنەوەی كۆمەڵگە و ڕاستكردنەوەی ڕێڕەوی ژیانی كۆمەڵایەتی و بەهێزكردنی گیانی خەباتگێڕی و فیداكاری و تێكۆشان لەپێناو گەل و نیشتمان و خاكدا ، پشت ئەستور بە فیقھ و فیكرو مەعریفەی سەردەمیانە و بە میتۆدێك و مۆدێلێكی تەواو جیاواز لەو فۆڕم و مۆدێلە تەقلیدییەی كە ئەوانی تر بانگەوازییان بۆ دەكرد و لێوان لێو بوو لە جەهل و نەزانی و فریودان و خەڵەتاندن و لە خشتەبردن و بەرژەوەند پەرستی و بە سوتەمەنی كردنی هەموو شتێك لەپێناو ئامانج و حەزە تایبەتەكاندا.
ئەحمەد كاكە مەحمود بە پێچەوانەی ئەو زاناو مەلایانەی كە لە ڕابردوو و ئێستاشدا بڕوایان بە پێكەوە گرێدانی دین و سیاسەت نیە و سیاسەت كردنیان لە پاڵ دینداریدا بە قاچاغ و كارەسات لێكداوەتەوە ، ئەو هەڵگری مەشخەڵی دین و دەوڵەت و سیاسەت بووە و ، ئەو ڕاستییەی بەگوێی هەموواندا داوە كە سیاسەت بەشێكە لە ئیسلام و ، دین و سیاسەت دوانەیەكی لێك جیانەكراوەن و ، به لای ئه وه وه چەسپاندنی دادگەری و بەدیهێنانی ئازادییەكان و گەڕاندنەوەی مافە زەوت كراوەكان بەبێ مومارەسەكردنی سیاسەت و گرتنە دەستی دەوڵەت و دەسەڵات و فەرمانڕەوایەتی مه حال بوو !
ئەحمەد كاكە وەك سەركردە و كاراكتەرێك و ڕەمزێكی بواری فیكرو سیاسەت و چاكسازیی و چاكەخوازیی هاوشێوەی كەڵەپیاوەكان وەك ئەفغانی و عەبدە و غەزالی و مەراغی و شەلتوت و كەواكیبیی و بەنناو بن بادیس و غەنووشی و ئەوانی تر حیزبایەتی و فرەیی سیاسيی بە زەرورەتێكی سەردەم دەزانی
، پێی وابوو لە ئەنجامی نەبوونی دەوڵەت و دەسەڵاتێكی ئیسلامیدا دەكرێ سیستمی دیموكراسیی و میكانیزمی هەڵبژاردن باشترینی خراپەكانی سەردەمی ئێستا بێت و گونجاوترین ئەڵتەرناتیڤ بێت لەبەرانبەر دەوڵەت و دەسەڵاتە خۆسەپێن و دیكتاتۆرەكاندا!
لەساڵیادی كۆچكردنیدا دەڵێم : لەڕاستیدا ئەحمەد كاكە لە بوارەكانی عیلم و فیقھ و فيكرو سیاسەت و ئیسڵاح و تازەگەریی و پاراستنی ڕەسەنایەتی و بەگژداچوونەوەی ستەم و جەهل و نەزانی و خورافەدا نمونەی نەوەوی و نەدەوی و ئیبنو تەیمیەو عەززامی نەتەوەكەی بووە ، ئەو بەڕاستی شەرعزانێكی پسپۆڕ ، موفەسیرێكی گەورە ، بانگخوازێكی هاوچەرخ ، سەركردە و خەباتگێڕو سیاسییەكی هەڵكەوتوو و بێ وێنەی میللەتەكەی بوو.
https://t.me/SAeed000l
