میدیاکانى ئێران بڵاویانکردەوە، عەلى باقرى وەزیری دەرەوەی ئێران بەوەکالەت، بەمەبەستى کۆبوونەوە لەگەڵ بەرپرسانى باڵاى عێراق گەیشتە به‌غدا.

پێشتر نازم دەباغ، نوێنەری حکومەتی هەرێم لە ئێران رایگەیاندبوو: عەلی باقری رۆژى پێنجشەممە سەردانی بەغدا دەکات و رۆژی هەینیش دەگاتە هەرێم و ئامانجى سەردانەکەشى بۆ هەرێم ئاشکرا کرد.

دەباغ وتیشی: لەگەڵ هەریەک لە مەسعود بارزانی و نێچیرڤان بارزانی و مەسرور بارزانی کۆدەبێتەوە، وا بریاریشە لە سلێمانی لەگەڵ بافڵ تاڵەبانی کۆببێتەوە.

ئاماژەی بەوەشکرد: ئامانجی سەردانەکە، پتەوکردنی پەیوەندییەکانی نێوان ئێران و هەرێمی کوردستانە، هەروەها بەدواداچوون بۆ ئەو رێککەوتنانە دەکات کە لە میانی سەردانەکەی سەرۆکی هەرێم بۆ تاران ئەنجام دراون لە بوارەکانی سیاسی و ئابوری فەرهەنگی و ئەمنییەوە.