بزووتنه‌وه‌ی ئیسلامیهەواڵ

دەزگای هەڵبژاردنی بزووتنەوەی ئیسلامی به‌شداری كۆبونه‌وه‌ی سەرۆکایەتی پەرلەمانی کوردستان كرد

سەرۆکایەتی پەرلەمان داوا دەکات سەرجەم حزبەکانی کوردستان بە یەک لیست بەشداری لە هەڵبژاردنەکانی پەرلەمانی عێراق بکەن
لەسەر بانگهێشتی لیژنەی ناوچە کوردستانییەکانی دەرەوەی ئیدارەی هەرێم، سەرۆکایەتی پەرلەمانی کوردستان لە گەڵ سەرجەم حزبەکانی هەرێمی کوردستان کۆبوویەوەو نوێنەری دەزگای هەڵبژاردنی بزووتنەوەی ئیسلامیش لە کۆبوونەوەکە بەشداری کرد.
ئەمڕۆ پێنج شەممە ۲٨ی کانوونی دووەمی ۲۰۲۱ لیژنەی ناوچە کوردستانییەکانی دەرەوەی ئیدارەی هەرێم بە ئامادەبوونی سەرۆکی پەرلەمانی کوردستان لە گەڵ سەرجەم دەزگای هەڵبژاردنەکانی حزبەکانی هەرێمی کوردستان کۆبوونەوەو رێواس فیەق، سەرۆکی پەرلەمانی کوردستان لە میانەی وتەیەکدا داوای لە حزبەکان کرد کە لە ناوچەکانی دەرەوەی ئیدارەی هەرێم بە یەک لیست بەشداری هەڵبژاردنەکانی پەرلەمانی عێراق بکەن بۆ ئەوەی لەو ناوچانە کورد بتوانێ کورسی پەرلەمانی بەدەست بهێنێت.
خەسرۆ گۆران، سەرۆکی دەزگای هەڵبژاردنی پارتی دیموکراتی کوردستان رایگەیاند: دۆخی ئێستای کورد لە ناوچە دبڕاوەکان لە مەترسیدایەو پێویستە کورد لەو شوێنانە بە یەک لیست بەشدار بێت و کوردسی پەرلەمانی مسۆگەر بکات.
ئاماژەی بەوەشکرد: راستە هەندی لایەن ناتوانن کورسی بێنن، بەڵام دەبێت بەپێی رێککەوتن لە دوای هەڵبژاردنەکان لە حکومەتی خۆ جێی کە دامەزرا لەو پارێزگایانەی کورد کورسی بەدەست دێنێت پشکی ئەو حزبانە لە حکومەتی خۆ جێی بدرێت.
نەوزاد خدر، سەرۆکی دەزگای هەڵبژاردنی بزووتنەوەی ئیسلامی بە باسک نێت-ی راگەیاند: داوکارییەکەی سەرۆکی پەرلەمان پرسێکی باشە، بەڵام دەبێت مافی سەرجەم لایەنەکان پارێزراو بێت نەک وەک هەندێ هەڵبژاردنی رابردوو حزبە باڵا دەستەکانی هەرێم دوای ئەوەی هەڵبژاردن تەواو دەبوو هیچ هەماهەنگی و پێوە کارکردنیان لەگەڵ حزبەکانی تری هەرێم نەدەکرد.
وتیشی:”ئێمە راسپاردەکانی کۆبوونەوەکە دەبەینەوە لای سەرکردایەتی حزب بۆ ئەوەی رای خۆیان لەسەر بدەن.
وتیشی: دەبێت حزبەکانی دەسەڵات خەڵکی ناوچەکانی دەرەوەی ئیدارەی هەرێم ئاشت بکەنەوەو بەڵێنی کرداری بە جەماوەری کوردستانی بدەن کە کاری جدی بکەن بۆ جێبەجێکردنی مادەی ۱٤۰ و گێڕانەوەی ئەو مافانەی کە لێیان زەوت کراوەو لە رووی ئەمنییەوە دۆخی ناوچەکانی دەرەوەی ئیدارەی هەرێم بۆ خەڵکی کوردو پێکهاتەکانی تر ئارام بێت.
لە کۆبوونەوەکەی ئەمڕۆی سەرۆکایەتی پەرلەمانی کوردستان هەریەکە لە پارتی دیموکراتی کوردستان، یەکێتی نیشتمانی کوردستان، بزووتنەوەی ئیسلامی کوردستان، کۆمەڵی ئیسلامی کوردستان، یەکگرتووی ئیسلامی کوردستان، بزووتۆەوەی گۆڕان، حزبی سوشیالیست دیموکراتی کوردستان، هاوپەیمانی نیشتمانی، زەحمەتکێشانی کوردستان، حزبی شیوعی کوردستان، لەگەڵ ژمارەیەک حزبی تری هەرێمی کوردستان و پێکهاتەکانی تورکمان و کلدوئاشووری بەشدار بوون لە کۆبوونەوەکەو پاڵپشتیان لە یەک لیستی کوردستانی کرد لە ناوچە کوردستانییەکانی دەرەوەی ئیدارەی هەرێم.

لێدوان بنوسە لەڕیگای فەیسبووکەوە

بابەتی دیكە

Close