مامۆستا ابراهیم عبدالرحیم حه‌مه‌ڕه‌زا / له‌ساڵی ( 1953 ) له گوندی ده‌ڵه‌مه‌ڕی نزیك هه‌ڵه‌بجه‌ی شه‌هید له‌دایك بووه و له خانه‌واده‌یه‌كی ئاین په‌روه‌روه‌ر و نیشتمان په‌روه‌ره‌ردا
دوای چه‌ند ساڵێك ماڵی باوكی له گوندی ده‌ڵه‌مه‌ڕه‌وه ده‌گوازنه‌وه شاری هه‌ڵه‌بجه‌ی شه‌هید و له گه‌ڕه‌كی كانی عاشقان به‌رامبه‌ر مزگه‌وتی جمهوری نیشته‌جێ ده‌بن، وه خانویه‌كی گه‌وره‌ی چوار ده‌سته‌ی به‌رامبه‌ر به‌یه‌كتر دروست ده‌كه‌ن , كه خوالیخۆسبوو هه‌موو كات ده‌ی گێڕایه‌وه ده‌ی ووت : كاتی خۆی كه باوكم ئه‌و خانووه‌ی دروست كرد له كانی عاشقان حكومه‌ت بڕیارێكی ده‌ركرد كه جاده‌یه‌ك له‌ناوبازاڕه‌وه لێبدات بۆ باوه‌كۆچه‌ك، له‌و كاته‌دا خزمانی گوندی ده‌ڵه‌مه‌ڕ خێریان كردبوو له‌ڕی خوا كه خانووه‌كه‌ی ماڵی خاڵۆو ڕه‌حیم به‌ربكه‌وێت و بگه‌ڕێنه‌وه بۆ ده‌ڵه‌مه‌ڕ , خاڵۆ ڕه‌حیم كه‌سایه‌تیه‌كی زه‌حمه‌تكێش و به‌هیممه‌ت بوو به ئاره‌قی ناوچه‌وانی خۆی نانی بۆ ماڵ و منداڵه‌كانی په‌یداده‌كرد ، هیچ كاتێك نانی حه‌رامی ده‌رخواردی منداڵه‌كانی نه‌داوه ، دایكیشیان كه داده ( پیرۆزه ) و ئه‌و كه‌سه‌ی له سالاَنی شه‌ست و حه‌فتاكان و هه‌شتاكاندا ژیابێت ده‌زانێت ئه‌و ژنه كێ‌یه ؟ چونكه ئه‌و خانمه به‌ڕێزه حه‌بسه‌خانی سه‌رده‌می خۆی بووه, ژنێك بووه هه‌موو كاتێك خاوه‌ن سفره‌و خوان بووه به ڕووی میوانی زۆری خزمان و پێشمه‌رگه دا،. خاڵۆوره‌حیم خاوه‌نی حه‌وت كۆڕ بووه به‌ناوه‌كانی (( محمد و عبدالقادر و أحمد و ابراهیم و اسماعیل و سعید و عبدالرحمن )) وه دوو كچی هه‌بوو به‌ناوی (( محبوب و محسوم )).
به هۆی نزیكی ماڵی خاڵۆو ڕه‌حیم له مزگه‌وته‌كانی جمهوری و ملا صاڵحی گه‌وره وه به‌هۆی هۆگری و دینداریه‌وه بۆ ئاینی پیرۆزی ئیسلام هه‌ر به منداڵی ( ابراهیم ) ی كوڕی ده‌نێرێته خزمه‌تی ( مامۆستا ملا محمدی بامۆك ) و دواتریش له‌گه‌ڵ هاوته‌مه‌نه‌كانیدا ده‌خرێته به‌ر خوێندن له قوتابخانه‌ی ئیسلامی و له‌و رێگایه‌وه ئاشنا ده‌بێت به كاری ئیسلامی و له بازنه په‌روه‌رده‌ییه‌كاندا ده‌گیرسێته‌وه و خۆی رێك ده‌خات و سوود له ئه‌زموون و ئاراسته‌ی پیاوانی گه‌وره‌ی ره‌وتی ئیسلامی شاره‌كه وه‌رده‌گرێت به‌تایبه‌ت مامۆستا شێخ عبدالعزیز پاڕه‌زانی و مامۆستاو مه‌لا عوسمان عبدالعزیز و مامۆستا عومه‌ر رێشاوی خوا غه‌رقی ره‌حمه‌تیان بكات له‌گه‌ڵ مامۆستایانی تری ئه‌هلی فه‌زڵ وه‌ك مامۆستا جه‌عفه‌ر مسته‌فا و مامۆستا محمد بامۆكی .
مامۆستا إبراهیم تا پۆلی شه‌شه‌می ئاماده‌یی درێژه به خوێندن ده‌دات و له ساڵی ( 1970 ) و پاش ئه‌وه‌ی هاوسه‌رگیری له‌گه‌ڵ (( به‌هیه)) خانی كچی حاجی احمدی بامۆكی دا ده‌كات ناچار ده‌بێت له‌به‌ر بژیوی ژیانی واز له خوێندن بهێنێت و له شاری سلێمانی له به‌ڕێوه‌به‌رایه‌تی كشتووكاڵ داده‌مه‌زرێت، بۆ ماوه‌ی چه‌ند ساڵێك له سلێمانی ده‌مێنێته‌وه ماڵه‌كه‌یان هه‌مووكاتێك وه‌ك ئوتێلێكی بچووك وابووه به‌ڕووی هه‌ڵه‌بجه‌ییه‌كاندا ، پاشان ده‌گه‌ڕێته‌وه بۆ هه‌ڵه‌بجه و بۆ ماوه‌ی چه‌ند ساڵێك له ئاماده‌یی كشتوكاڵ به‌رده‌وام ده‌بێت ، به‌لاَم به‌هۆی نه‌بوونی ئینتمای به حزبی به‌عسه‌وه پاشان فیرابوونیه‌وه ناتوانێت به‌رده‌وامی پێ بدات، بۆیه به‌ناچاری له‌لای كاك محمدی براگه‌وره‌ی ده‌ست ده‌داته پیشه‌ی ئاسنگه‌ری و دواتر خۆی دوكانێ داده‌نێت، له‌گه‌ڵ ئه‌مانه‌ش دا هه‌مووكات په‌یوه‌ندیه‌كانی به (( م .ملاعوسمان و م.ملا علی )) یه‌وه هه‌ربووه و هه‌موو كاتێك ( م.ملاعلی ) ده‌یگێڕایه‌وه له‌كاتی خۆی شیوعیه‌كان چه‌ند ژنێكیان هانده‌دا بۆ ئه‌وه‌ی به‌رد بگرنه ( م.ملا عومه‌ر) له ڕێگای مزگه‌وتی جمهوری ، به‌لاَم داده پیرۆزی دایكی مامۆستا ابراهیم چاكی پڕده‌كرد له به‌ردوو ده‌چوو پارێزگاری له مامۆستا ملا عمر ده‌كرد تا ده‌چووه ماڵی خۆیان ، پاشان زوڵم و زۆری به‌عسی یه‌كان ( م.ملا ابراهیم ) والێده‌كات ئاڵتوونی خێزانی بفرۆشێت و ده‌مانچه‌یه‌كی پێ بكڕێت تا پاسه‌وانی ئه‌و مامۆستا به‌ڕێزانه‌ی پێبكات ، وه‌به‌رده‌وام له خزمه‌ت ئه‌و مامۆستا به‌ڕێزانه‌دا ده‌بێت تا ڕاپه‌ڕینه‌كه‌ی 13/5/1987ی شاری هه‌ڵه‌بجه له‌گه‌ڵ ئه‌و مامۆستا به‌ڕێزانه‌دا ده‌چێته وولاَتی ئێران ، وه‌هه‌ر له‌هه‌مان ساڵدا بزووتنه‌وه‌ی ئیسلامی ڕه‌گه‌یه‌نرا و ( م.ملاعوسمان ) كرایه ڕابه‌ری گشتی و مامۆستا إبراهیم
یه‌كه‌م كه‌س ده‌بێت و ده‌چێته خزمه‌ت مامۆستا و پێی ده‌ڵێت بۆچی له‌م كاته‌دا بزووتنه‌وه ڕاده‌گه‌یه‌نیت و ده‌ست ده‌ده‌یته خه‌باتی چه‌كداری ، ئه‌ویش ده‌ڵێت (( وه‌لاَهی ئه‌وه چه‌ند جاره له‌خه‌ودا پێغه‌مبه‌ر ( درودی خوای له‌سه‌ر بێت ) دێته خه‌وم ئه‌م ئالاَی لااله الاالله محمد رسول الله) ده‌داته ده‌ستم و ده‌فه‌رموێت هه‌سته ڕایبگه‌یه‌نه بۆیه ئه‌م جیهاده‌م ڕاگه‌یاند، پاش ئه‌م وته‌یه په‌یمان ده‌دات كه‌وه‌ك پێشمه‌رگه‌یه‌ك به‌خۆی و سه‌یاره‌یه‌كی ( لاندرۆڤه‌ری) ئه‌وسه‌رده‌مه له‌خزمه‌تی دابێت ، هه‌ر له‌و كاته‌دا جه‌نابی مامۆستا مه‌لا عوسمان پێ ی ده‌فه‌رموێت مه‌لا إبراهیم خه‌مێكی ته‌فسیره‌كه‌م بخۆو هه‌رچۆن بووه بنێرن له هه‌ڵه‌بجه‌وه بۆم بێنن به‌ڵكو خوا ده‌رفه‌تم بدات ته‌واوی بكه‌م، ئه‌ویش ژیانی خۆی ده‌خاته مه‌ترسی و به نهێنی ده‌گه‌ڕیته‌وه هه‌ڵه‌بجه‌و ته‌فسیره‌كه ده‌گه‌یه‌نێت به مامۆستا.
له‌گه‌ڵ راگه‌یاندنی بزووتنه‌وه‌ی ئیسلامیدا به‌هۆی لێهاتوویی و ده‌ست پاكی یه‌وه ده‌كرێته به‌رپرسی ده‌فته‌ری پاوه‌ی بزووتنه‌وه تاڕاپه‌ڕینه مه‌زنه‌كه‌ی ساڵی (( 1991 )) .
پاشان ده‌بێته به‌رپرسی مه‌ڵبه‌ندی هه‌ڵه‌بجه‌ی بزووتنه‌وه‌ی ئیسلامی ، پاشان له سالاَنی (( 1992 )) ده‌ست له به‌رپرسایه‌تی ده‌كێشێته‌وه به‌لاَم هه‌موو كات ماڵه‌كه‌ی جێگای ئیسراحه‌تی به‌رپرسان و پێشمه‌رگه‌كانی بزووتنه‌وه بووه ، ده‌چێته‌وه ماڵی خۆی و ده‌ست ده‌كاته‌وه به‌پیشه‌كه‌ی خۆی كه ئاسن گه‌ری بووه ، به‌رده‌وام ده‌بێت له‌و كاره تا ساڵ (( 1995 )) كه ئه‌و سالاَنه پڕبوون له ساڵانی مه‌ینه‌تی و برسیه‌تی و گرانی به‌ڕه‌نجه شانی ماڵ و منداڵی ده‌ژیاند و میوانێكی زۆری كۆنگره‌كانی به‌ڕێده‌كرد كه‌له‌شاره‌كانه‌وه ده‌هاتن ده‌یانگووت ته‌نها له‌ماڵی ( كاك ملا) استراحه‌تمان بۆ ده‌كرێت ، به‌رده‌وام بوو له‌كاری خۆی پاشان سه‌ركردایه‌تی بزووتنه‌وه بڕیاریاندابوو كه كه‌سێكی ئه‌مین و ده‌ست پاك بكه‌ن به لێپرسراوی گومرگی بزووتنه‌وه‌ی ئیسلامی كه جێگای متمانه‌ی هه‌موو لایه‌ك بێت ، بۆیه به‌كۆی ده‌نگ بڕیاریاندا به دانانی له مه‌سئوولی گومرگی هه‌ورامان ، ئه‌ویش له‌به‌ر خاتری ئه‌و سیقه و متمانه‌ی نه‌توانی ئه‌و كاره‌قورسه هه‌ڵنه‌گرێت ، به‌رده‌وام بوو له و پۆسته تا گومرگه‌كانی ئه‌و سنوره درانه‌وه ده‌ست حكومه‌تی ئه‌و كاته‌ی سلێمانی ، بزوتنه‌وه مانگانه بڕی ( 2) دوو ملیۆن دیناری سویسری له حكومه‌ت وه‌رده‌گرت ، هه‌ر مامۆستا خۆی هه‌موو مانگێك له سلێمانی وه‌رده‌گرت و له دارای گشتی دابه‌شی ده‌كرد ، وه له ساڵی (( 1999 )) له‌گه‌ڵ چه‌ند برایه‌ك ده‌یانه‌وێت له ڕێگای وولاَتی سوریاوه بچن بۆ فه‌ریزه‌ی حه‌ج ، به‌لاَم ڕێگایان نادرێت بچن بۆ ئه‌و جێگا پیرۆزه ، بۆیه پێیان ده‌وترێت بچن بۆ ئێران و له تارانه‌وه بچن ، به‌لاَم دوای چه‌ند ڕۆژێك له‌چاوه‌ڕوانی بێ ئومێد ده‌گه‌ڕێنه‌وه ، پاشان له ساڵی ( 2010 ) شدا به‌مه‌به‌ستی فه‌ریزه‌ی حه‌ج جارێكی تر چونه‌وه وولاَتی ئێران پاشان به نا ئومێدی گه‌ڕانه‌وه بۆ هه‌ڵه‌بجه‌ی شه‌هید ، یه‌كێك له‌و براده‌رانه‌ی كه‌له‌گه‌ڵیدابوون ده‌گێڕنه‌وه ئه‌و ڕۆژانه‌ی چاوه‌ڕوانكردنه‌ی زۆر به سه‌ختی و دڵپڕله گریان به‌سه‌ر ده‌برد ،
مامۆستا إبراهیم كه‌ساتیه‌كی كۆمه‌ڵایه‌تی دیاری شاری هه‌ڵه‌بجه بووه و رۆڵی به‌رچاوی هه‌بووه له چاره‌سه‌ری كێشه كۆمه‌ڵایه‌تیه‌كاندا و هه‌میشه به‌ته‌نگ خه‌ڵكی لێقه‌وماوه‌وه بووه به‌بێ جیاوازی و، كه‌سێكی ساده و خاكی خۆشه‌ویست بووه له‌لای هه‌مووان به‌تایبه‌ت لای برا پێشمه‌رگه‌كانی ، بۆیه هه‌مووكات ئه‌ندامانی بزووتنه‌وه و سه‌ركردایه‌تی داوایان لێده‌كرد كه‌خۆی هه‌ڵبژێرێت بۆ ئه‌ندامی سه‌ركردایه‌تی به‌لاَم هیچ كات حه‌زی لێنه‌ده‌كرد ، تاكو چه‌ند برایه‌ك هاتنه ماڵ و داوای وێنه‌یه‌كی خۆی و بێناسی باری كه‌سیه‌تی یان لێكرد ، فۆڕمی كاندیدی بۆ سه‌ركردایه‌تی پێپڕكردبوه‌وه به‌بێ ئاماده‌بوونی خۆی له‌ناو كۆنگره‌دا هه‌ڵده بژێرێت بۆ سه‌ركردایه‌تی ، هه‌ر به‌هۆی ئه‌و ده‌ست پاكیه‌ی كه له ژیانی دا ناوبانگی پێده‌ركردبوو ، ده‌كرێته به‌رپرسی دارایی گشتی بزووتنه‌وه و، به‌رده‌وام ده‌بێت له‌و پۆسته تا كو كۆنفرانسی پێنجی بزووتنه‌وه ، له‌و كۆنفرانسه‌دا دوو باره به‌كۆی ده‌نگ ده‌نگیان پێدایه‌وه وه‌ك باشترین به‌رپرسی مه‌كته‌ب ، هه‌رله‌و پۆسته به‌رده‌وام ده‌بێت تا ڕۆژی ((11 / 11 / 2010)) كه به كارێكی فه‌رمی بزووتنه‌وه ده‌چێته شاری هه‌ولێر و له كاتی گه‌ڕانه‌وه‌یدا تووشی ڕوداوێكی نه‌خوازراوی هاتووچۆ ده‌بێت و ڕۆحی پاكی ده‌گه‌ڕێته‌وه دیوانی خوای په‌روه‌ردگارو ، له ئاپۆرایه‌كی جه‌ماوه‌ری گه‌وره‌دا ته‌رمه‌كه‌ی ده‌هێنرێته‌وه هه‌ڵه‌بجه‌ی شه‌هید و له گۆڕستانی ( ابا عبیده) به‌خاك ده‌سپێرێت و شكۆو گه‌وره‌یی رێ و ره‌سمی پرسه‌كه‌ی كه به شاهیدی هه‌مووان له‌و شاره‌دا ناوازه‌و كه‌م وینه‌بووه گه‌واهی گه‌وره‌یی پله‌و پایه‌ی كۆمه‌ڵایه‌تی ئه‌و پیاوه مه‌زنه بوو.
له‌پاش خۆی چوار كوڕ به‌ناوه‌كانی ( فه‌رهاد –بیلال-فریاد- به‌ڵێن ) و چوار كچ به‌ناوی ( ڕووناك و ڕوخۆش و دڵگیر و دڵپاك ) ، بۆ خزمه‌تی ئیسلام به‌جێ ده‌هێڵێت .
بەشی یەکەم و دووەمی ژیانی ئەم کەڵە پیاوە بە دەنگ و رەنگ لێرە ببینە..
