هێزەکانی ئەمریکا ڕایانگەیاند، کە هێلیکۆپتەرێکی سەربازیی ویلایەتە یەکگرتووەکانی ئەمریکا لە ئاوەکانی دەریای عەرەب و لە ناوچەیەکی نزیک لە کۆماری ئیسلامیی ئێران کەوتووەتە خوارەوە، جەختیش دەکرێتەوە کە سێ لە سەرنشینەکانی ڕزگارکراون.
ئەمڕۆ چوارشەممە، 1ـی تەممووزی 2026، سەرچاوە هەواڵییە نێودەوڵەتییەکان بڵاویانکردەوە، کە هێلیکۆپتەرێکی سەر بە هێزی دەریایی ئەمریکا لە کاتی جێبەجێکردنی ئەرکێکدا لە دەریای عەرەب کەوتووەتە خوارەوە. بەپێی زانیارییە سەرەتاییەکان، سێ لە ئەندامانی تیمی فڕۆکەوانییەکە بە سەلامەتی دۆزراونەتەوە و ڕزگارکراون، بەڵام گەڕان بەدوای چوارەم سەرنشینی هێلیکۆپتەرەکەدا بە چڕی بەردەوامە.
سەرچاوە سەربازییەکانی ئەمریکا ئاماژەیان بەوە کردووە، کە تاوەکو ئێستا هیچ بەڵگە یان ئاماژەیەک لە ئارادا نییە کە بسەلمێنێت ڕووداوەکە بەهۆی هێرش یان کارێکی دوژمنکارانەی لایەنە دژبەرەکانەوە بووبێت، بەڵکو ئەگەرە سەرەتاییەکان بەرەو کێشەی تەکنیکی دەچن.
لە ئێستادا، یەکەکانی هێزی دەریایی ئەمریکا لە ناوچەکەدا سەرجەم تواناکانیان خستووەتە گەڕ بۆ دۆزینەوەی ئەو ئەندامەی تیمی فڕۆکەوانییەکە کە تا ئێستا بە بێسەروشوێنی ماوەتەوە، هاوکات لایەنە پەیوەندیدارەکانی پنتاگۆن لێکۆڵینەوەی پێویستیان بۆ دیاریکردنی هۆکاری ڕاستەقینەی کەوتنەخوارەوەی هێلیکۆپتەرەکە دەستپێکردووە.
