نوسەران

بۆچی هەموومان بێزارین ؟!

بۆچی هەموومان بێزارین ؟!

پ . د . سەعید عەلی محەمەد✍️باسک نێت

( بێزاریی ) حاڵەتێکی دەروونیی نێگەتیڤە و ، هەندێ جار باڵ بەسەر ژیانی مرۆڤەکاندا دەکێشێ و ، دەبێتە هۆی بێ بەشکردنیان لە چێژ و ئارامیی و ئاسوودەیی دڵ …ئەم حاڵەتە دەروونییە خراپە مرۆڤەکان دەکاتە دیلی خەفەت و پەژارەو دڵەڕاوکێ و ، بەرەو لاوازبوونی ورەو حەماسەت و سست بوون و خاوبوونەوە دەیانبات!!

زۆر جار ئەو  بێزاری و  بێ تاقەتی و شڵەژانە دەروونیی و  کارەساتەی تێیدا دەژیت  لەبەر ئەوە نیە
( تۆ هاوسەرییت نەکردووەو تەنهایت  ،  یان بەتاڵ و بێ کاری  ،  یان  لەبەرئەوەی گرفتێکت هەیە  ،  یان لەبەر ئەوەی نەخۆشی ….. تادوایی ).

بەڵکو هۆکارێک لە هۆکارە سەرەکیەکان  ئەوەیە  :   تۆ دەقت بە جۆرە ژیانێکی تایبەتەوە گرتووە  ،  لە گەڵ  ڕۆتینێکی  ڕۆژانەی  دووبارە بوەوەدا  ڕاهاتوویت  ،  کۆمەڵێ  جموجۆڵ و  چالاکی دیاریکراوی  ڕۆژانە ئەنجام دەدەیت و  هیچی تر !!!!!

نموونەیەک  بۆ زیاتر  ڕوونکردنەوە  :

تۆ لە خانوو و کۆشکێکی جوان و گەورەدا دەژیت  ،  ژیانێکی ماددی نایاب و چاکت هەیە  ،  هەموو جۆرە  پێداویستیەکت لەبەر دەستەو ئامادەیە  ،  بەڵام تۆ هەموو کاتەکانی ڕۆژانەت  لە تۆڕە کۆمەڵایەتیەکان و  ،  سەیرکردنی ڤیدیۆ و  ،  دەرچوون  لەگەڵ هاوڕێکانت بۆ گەڕان و گازینۆ و نادیەکان بەسەر دەبەیت !

ئەم ڕیتمە لە ژیانکردن ڕۆژانە بەم شێوە ،  بەرە بەرە  تۆ بەرەو  بێزاری و بێ تاقەتی و وەڕەس بوون لە ژیان و  ،  نائومێدی و بێ هیوایی و  ڕەشبینی دەبات …
تۆ هیچت پێویست نیە و ژیانت خۆشە  ،  بەڵام ڕیتم و  سروشتی ژیانی ڕۆژانەت و ،  جۆری جموجۆڵ و پەیوەندیەکانت …
بێزار بوون و  ڕەشبینی و قەلەق و نائارامیی دەروونی  بۆ دروست کردوویت.
نەک   –  بۆ نمونە  –  هەژاریی و نەبوونی و بێ پارەیی و برسێتی  !!

دەبێ بزانین … ئاسوودەیی و  دڵخۆشیی و ئارامیی دڵ و  دەروون  تەنها ڕێچکەیەک و ئاراستەیەکی تایبەت و  دیاریکراو نیە  ،  بەڵکو  کاروانێکە  ،  ئێمە دەتوانین لە ڕێی گۆڕین ڕەفتارو  نەریتە ڕۆژانەکانمان و  ،  هەمە چەشنەکردنی جوڵەو  بەرهەم و  چالاکیەکانمانەوە  ،  ئەو کاروانە جوانترو  ڕازاوەترو زیندووترو  پڕ چێژ تر  بکەین.

لێدوان بنوسە لەڕیگای فەیسبووکەوە

بابەتی دیكە

Close