لیستی مووچەی مووچەخۆرانی هەرێمی کوردستان کارا کراوە و ئەم مانگە سەرجەم فەرمانبەران 1% لە مووچە بنەڕەتییەکانیان دەبڕدرێت.
یادگار جەبار، سەرپەرشتیارى لیژنەى بایۆمەتری لە سلێمانی رایگەیاند، رۆژی رابردوو لە نوێترین رێنماییدا داوایان لێکراوە بەگوێرەی بڕیاری 281ـی وەزارەتی پلاندانانی عێراق و راسپاردەی وەزیری دارایی و ئابووری عێراق، بە رێژەی 1% لێبڕین لە مووچەی بنەڕەتی فەرمانبەران بکرێت.
هاوکات فێنک حەسیب، سەرپەرشتیاری لیژنەى بایۆمەتری لە هەولێر لەبارەی هۆکار و مەبەستی لێبڕینەکەوە رایگەیاند، “ژمارەی کەسیی بێهاوتا کە بە UPN ناسراوە و بووەتە ژمارەی وەزیفی، لەبەرامبەر ئەوەدا بەغدا داوای کردووە، ئەو لێبڕینە بکرێت لە مووچەی بنەڕەتی و سەرجەم فەرمانبەرانى هەمیشەیی و گرێبەست بگرێتەوە و لێبڕینەکە تەنها بۆ یەک مانگە و لەسەر لیستی مووچەی مانگی ئایار جێبەجێدەکرێت”.
لێبڕینی 1٪ـى مووچە بەجۆرێکە، لە کۆى مووچەى بنەڕەتى فەرمانبەران دەبێت، ئەگەر فەرمانبەرێک مووچەى بنەڕەتییەکەى 400 هەزار دینار بێت، تەنیا چوار هەزار دینارى لێدەبڕدرێت.
