هیچ كەسێك مافی ئەوەی نییە گۆڕانكاریی و چاكسازیی لە هیچ دۆسیەیەكدا بەسەرماندا بسەپێنێت
باسک نێت
لەسەرەتای رووداوەكانی سوریاوە سوربووین لەسەر ئەوەی عێراق لایەنگری هیچ لایەن و گروپێك نەكات و، بژاردە بۆ خەڵكی سوریا خۆیان بەجێبهێڵین بڕیار لەسەر چارەنوسی خۆیان بدەن.
كەسانێك هەوڵیاندا گۆڕانكاریی لە سوریا ببەستنەوە بە قسەكردن لەسەر گۆڕینی سیستەمی سیاسییەوە لە عێراق، ئەمەش بابەتێكە كە بواری گفتوگۆی تێدا نییە.
سیستەمێكی فرەیی دیموكراتمان هەیە كە هەمووان لەخۆدەگرێت و زامنی ئاڵوگۆڕی ئاشتییانەی دەسەڵاتە و رێگە بە چاكسازیی و راستكردنەوەی كەموكورتییەكان دەدات لەژێر چەتری دەستورو یاسادا.
هیچ كەسێك مافی ئەوەی نییە گۆڕانكاریی و چاكسازیی لە هیچ دۆسیەیەكدا بەسەرماندا بسەپێنێت، ئابوری بێت یاخود ئەمنیی، ئەمە لەگەڵ ئەوەدا كە دان دەنێین بە بوونی پێویستیی بە پرۆسەی چاكسازیی لە سەرجەم جومگەكاندا.
دەبێت پێداچوونەوە بە دەستكەوتەكانماندا بكەین، بەوانەشدا كە تێیدا دواكەوتووین، دەستكەوتەكان گەورەترو زۆرترن، چونكە سیستەمێكی سیاسیمان بنیادناوە كە پشتبەستە بە دەستورێك كە نوێنەرایەتیی هەموو عێراقییەكان دەكات.
ئاستی جێبەجێكردنی بەرنامەكانی حكومەت گەیشتوەتە زیاتر لە 60%، چاكسازیمان لە پەیكەریی ئیداری و ئابوریدا كردووە.
زۆر كاری گرنگمان تەواو كردووە لەوانە سازدانی هەڵبژاردنی ئەنجومەنی پارێزگاكان، سەرژمێریی دانیشتوان، رێكخستنی پەیوەندیی لەگەڵ هاوپەیمانی نێودەوڵەتیی، چوارچێوەدانان بۆ پەیوەندییەكی نوێ لەگەڵ نێردەی نەتەوە یەكگرتووەكان.
حكومەتەكەمان بەردەوامە لە چاكسازیكردن لە دامەزراوە ئەمنییەكان، ئەمەش لەرێگەی لیژنەیەكەوە كە بە سەرۆكایەتیی ئێمە دروستكراوەو نەخشەرێگایەكی داناوە بۆ بەدیهێنانی ئەو چاكسازییانەی كە چاكسازییەكانی تر لە بواری ئابوری و ئیداریدا تەواو دەكات.
حكومەتەكەمان كاریكردووە بۆ دووبارە بنیادنانەوەی پەیوەندی عێراق لەگەڵ وڵاتان، لەسەر بنەمای “دیپلۆماسیەتی بەرهەمدار”و دەستپێكردنی شەراكەتی ئابوریی و گەشەپێدان كە عێراق دەكات بە خاڵی بەیەكگەیشتنی بەرژەوەندییەكان نەك مۆڵگەیەك بۆ ململانێی و بەریەككەوتن.
لەماوەی مانگەكانی رابردوودا كارمان كردووە بۆ دورخستنەوەی عێراق لەوەی ببێت بە گۆڕەپانی جەنگ.
