پاش ئەوەی لە ماوەی ڕابردوودا بەنزینخانەیەکی نزیک لە ماڵی هاوڵاتییان لە سۆران گڕیگرت، هەروەها چەند شەوێک پێش ئێستا باڵەخانەیەکی نیشتەجێبوون لە هەمان شار گڕیگرت و قوربانیی لێکەوتەوە، 13 بەنزینخانەی نزیک لە شوێنی نیشتەجێبوونی هاوڵاتییان لەو شارە داخران.
پاش ئەوەی ڕۆژی 11-10-2023، ئاگر لە بەنزینخانەیەکی نزیک لە ژمارەیەک ماڵی هاوڵاتییان، لەناو شاری سۆران کەوتەوە، هەروەها ڕۆژی هەینیش، 08-12-2023، هەر لە سۆران، باڵەخانەیەکی نیشتەجێبوون ئاگریگرت و لە ئەنجامدا 14 کەس گیانیانلەدەستدا و هەشت کەسیش برینداربوون؛ بڕیاردرا ئەو بەنزینخانانەی دەکەونە نزیک شوێنی نیشتەجێبوونی هاوڵاتییان دابخرێن.
ره‌جه‌ب زوبێر، قایمقامی قه‌زای ناوه‌ندیی سۆران ڕایگەیاندووە، هۆکاری داخستنی ئەو بەنزیخانانە لەبەر ئەوەیە “نزیکن لە ماڵ و ناوچەی نیشتەجێبوون. دەبوو تاوەکو ئێستا %100ـی مەرجەکانی بەرگریی شارستانییان جێبەجێکردبا و بە نووسراوی فەرمی ئێمە ئاگادار کراباینەوە کە ئەمانە هیچ مەترسییان لەسەر خەڵکی دروست نەکردووە، هەر بۆیە بڕیارماندا بە داخستنیان”.
