كوردستانهەواڵ

وەزارەتی کارەبا روونکردنەوەیەکی لەسەر کەمبوونەوەی بڕی کارەبا بڵاوکردەوە

وەزارەتی کارەبا روونکردنەوەیەکی لەسەر کەمبوونەوەی بڕی پێدانی کارەبا بڵاوکردەوە و ڕایگەیاندووە، بەهۆی لەکارکەوتنى چەند وێستگەیەکەوە بڕی پێدانی کارەبایی نیشتمانی کەمبووەتەوە

 لە ڕوونکردنەوەکەی وەزارەتی کارەبادا هاتووە ، لە ماوەی چەند رۆژی رابردوو، بەهۆی دابەزینی پەستانی گاز لە وێستگەی گازی خورمەلە و لەکارکەوتنی دوو وێستگەی دیکەی گازی لە هەولێر بەهۆی کێشەی تەکنیکییەوە، بڕی بەرهەمهێنانی کارەبا بە ڕێژەی (400) مێگاوات لە (3400) بۆ (3000) مێگاوات نزمبووەوە .

ئەوەشی تێدا هاتووە، هاوکات لەگەڵ بەرزبوونەوەی پلەی گەرما، خواست لەسەر بەکارهێنانی کارەباش بە ڕێژەی (600) مێگاوات بەرز بووەوە .

ڕاشیگەیاندووە، لە سەرەتای مانگی حوزەیران، خواست لەسەر کارەبا (3800) مێگاوات بوو، لە ماوەی چەند رۆژی رابردوو لەگەڵ بەرزبوونەوەی پلەی گەرما، خواست لەسەر کارەبا بۆ (4400) مێگاوات بەرزبووەوە .

ئاماژەى بەوەشکردووە، کێشە تەکنیکییەکانی وێستەگەکانی لە کارکەوتوو بەم زووانە چارەسەر دەکرێن و بڕی بەرهەمهێنانی کارەبا دەگاتە ئاستی جاران.

وەزارەتی کارەبا ئەوەشی خستووەتەڕوو، بۆ پاراستنی هاوسەنگی لە نێوان خواست و خستنەڕووی کارەبا و کەمکردنەوەی بۆشاییەکە بۆ پێدانی کارەبای زیاتر داوا لە هاوڵاتییان دەکەین دەست بە بەکارهێنانی کارەباوە بگرن و ئەو ئامێر و گلۆپانەی کە زۆر پێویست نین کەم بکەنەوە، بەتایبەتی ئەو هاوبەشانەی کە پێوەری زیرەکیان نەبەستووە و دەگاتە 52% هاوبەشانی کارەبا .

لێدوان بنوسە لەڕیگای فەیسبووکەوە

بابەتی دیكە

Close