عێراقهەواڵ

داعش به‌رپرسیارێتی ته‌قینه‌وه‌كه‌ی كازمییه‌ی گرته‌ ئه‌ستۆ

دوو كه‌س گیانیان له‌ده‌ستدا و 14 كه‌سی دیكه‌ بریندار بوون، له‌ ئاكامی ته‌قینه‌وه‌ی بتڵێك غاز له‌ ناوچه‌ی كازمییه‌. وه‌ك ئه‌وه‌ی سه‌رچاوه‌ ئه‌منییه‌كانی عێراق رایانگه‌یاندووه‌.

به‌ گوێره‌ی زانیارییه‌ میدیاییه‌كان، بتڵێك غاز له‌ به‌رده‌م چێشتخانه‌یه‌كی كازمییه‌ ته‌قییه‌وه‌ و بتڵه‌ غازه‌كه‌ هی كه‌سێكی شانده‌ری فرۆش بووه‌.

هاوكات ته‌قینه‌وه‌كه‌ زیانی زۆری به‌ر دوكان و شوێنكاره‌كانی ناوچه‌كه‌ گه‌یاندووه‌ و تیمه‌كانی فریاكه‌وتن، برینداره‌كانیان گواستووه‌ته‌وه‌ بۆ نه‌خۆشخانه‌.

ئاژانسی ئه‌عماقی سه‌ر به‌ داعش بڵاویكرده‌وه‌، مه‌فره‌زه‌یه‌كی ئه‌منی داعش توانیویانه‌ قایمكارییه‌ ئه‌منییه‌كانی عێراق بشكێنن و ته‌قینه‌وه‌كه‌ی كازمییه‌ ئه‌نجام بده‌ن.

ئاژانسه‌كه‌ باسی له‌وه‌شكردووه‌، ته‌قینه‌وه‌كه‌ قه‌ره‌باڵغییه‌كی شیعه‌كانی كردووه‌ته‌ ئامانج، كه‌ له‌ به‌رده‌م مه‌زارگه‌یه‌كیان له‌ ناوچه‌ی كازمییه‌ی به‌غدا درووستیان كردبوو.

به‌ گوێره‌ی زانیاری ئه‌و ئاژانسه‌ی داعش، له‌ ئاكامی ته‌قینه‌وه‌كه‌ 3 كوژرا و زیاتر له‌ 20 بریندار هه‌ن.

ئاژانسه‌كه‌ باسی له‌وه‌شكردووه‌، حكومه‌تی عێراق ویستوویه‌تی سرووشتی راسته‌قینه‌ی كرده‌وه‌كه‌ باس نه‌كات و ئاماژه‌یان بۆ ئه‌وه‌ كردووه‌ بۆری غازی چێشتخانه‌یه‌ك ته‌قیوه‌ته‌وه‌.

شه‌وی رابردوو، شانه‌ی راگه‌یاندنی ئه‌منی عێراق، بڵاویكرده‌وه‌، ته‌قینه‌وه‌كه‌ی كازمییه‌ به‌ هۆی بتڵی غازی چێشتخانه‌یه‌ك بووه‌ و له‌ ئاكامیدا دوو كه‌س كوژراون و 14ی دیكه‌ بریندار بوون.

لێدوان بنوسە لەڕیگای فەیسبووکەوە

بابەتی دیكە

Close