مەزەی سۆشیال میدیا و مەزەکەی دیوەخانی جاران

مەزەی سۆشیال میدیا و مەزەکەی دیوەخانی جاران.
خاڵی هاوبەش و جیاوازی

عه‌دنان نوری

جاران لەکۆڕو مەجلیسە کۆمەڵایەتیەکاندا ناوێک دەکەوتە سەرناوان و هەرکەس بۆخۆی قسەی لەسەردەکرد و بەئەنواع شێوە ئەهێنرا و ئەبرا و پێیان دەوت مەزەی مەجلیس.

دوای ماوەیەکی دی ئەهلی مەجلیس دەیانگرت بەیەکێکی ترەوە و بەچاک و خراپی ئەمیشدا دەهاتنە خوارێ و بێ پەڕو باڵیان دەکرد.

ئیدی ئەمە مەجلیسی شەوانی گوێ ئاگردانی پاییزو زستانی خەڵکی ئاوایی بوو

هەندێ جاریش کەسیان دەست نەدەکەوت بەردەبونە گیان و ژیانی یەکتری.

گرنگ بەلایانەوە بابەتی شەوانی گوێ ئاگردان بوو ئیتر ئەو کەسە دۆستیان بوایە و لەخۆشەویستیدا بوایە یان ڕقیان لێی بوایە و پێیان ڕابواردایە یان خۆی وای دەکرد بکرێتە مەزەی مەجلیس.

ئێستای تۆڕی کۆمەڵایەتیش هەمان ڕیتمی وەرگرتوە و بەهەمان ستایلی گاڵتە پێکردن و ڕابواردن بابەتێک دەکرێتە مەزەی ڕۆژی سوشیا میدیا و دەخرێتە ناو ناوانەوە و هەریەکەو لای خۆیەوە کۆمێنتێکی بۆ فڕێ ئەیا و هەرچی بەخەیاڵیا بێ دەری دەبڕێ.

خاڵی هاوبەشی هەردوو مەزەکە ئەمانەیە…..

۱.جاران ئاغا لەمەجلیسدا سەرەداوی دەکردەوە و بابەتەکەی ئەوروژاند
ئێستا حیزبی فڵان و کاک فیساری حیزبی لەڕێی پەیج و ئاکاونتە فەیکە کانیەوە سەرەداوێ ئەوروژێنێ.

۲.جاران ئاغا بەردەستەکانی خۆیان ڕاهێنابوو بۆ خۆش کردنی مەجلیس بەحەزو خواستی ئەمان درێژە بەباتەکە بدەن.
ئێستاش لایەنگر و بەردەستەکانی فڵان و فڵانی ڕاهێنراون بەدرێژە پێدانی بابەت لەسەر حەزو خواستی خۆیان.

۳.جاران هەندێ کەس بەویستی ئاغا دەکرانە ئامانج و ئەگەر کەسەکە پاک و چاک و سەرڕاست و دەمڕاستیش بوایە ، گرنگ ئەوەبوو بەخواستی ئەو دەکرایە ئامانج.

ئێستاش بەویست و خواستی حیزبی فڵان و فڵان بەرپرس کەسێک دەکرێتە ئامانج و شەن و کەوی دەکەن.

٤.جاران بەردەست بۆ بەرماوەی ئاغا بەردەبونە وێزەی خەڵکی تر
ئێستاش بەردەست بۆ بەرماوەی فڵان و فیسار ئەوە دەکەن ئیتر کەسەکە باچاکیش بێ و باپاکیش بێ.

بەڵام خاڵی جیاوازی لەمانەدایە
۱.جاران ئەوانەی لەمەجلیسی ئاغابون بۆیان هەبوو قسەبکەن کەڕێپێدراوی ڕەسمی بون و هەموکەس بۆی نەبوو قسە بکات.
بەڵام ئێستا ڕاهێنراوو ڕانەهێنراو خۆیانی تێ فڕێ ئەیەن و بەهەق و ناهەق قسەی تیا دەکرێ.

۲.جاران بەخواستی ئاغا بابەت و کەس دیاری دەکرا و دەکرایە باس و بابەتی شەوانی گوێ ئاگردان
بەڵام ئێستا خەڵک خۆیشی بابەت دروست دەکات و دەیکاتە بابەتی ڕۆژ و سوشیاڵ میدیا.

تۆش جی دەزانی لەخاڵی هاوبەش و جیاوازی ئیزافەی کە