بزووتنه‌وه‌ی ئیسلامیكوردستانهەواڵ

بەرپرسێکی باڵایی بزووتنەوە هۆشداری دەداتە یەکێتی و پارتی

بەرپرسێکی باڵایی بزووتنەوە هۆشداری دەداتە یەکێتی و پارتی

30 ساڵە حكومەتن وەزارەتی پێشمەرگە دەسەڵاتی بەسەر یەكەی (70) و (80)دا نییە

بەناوی خوای بەخشندەی میهرەبان

بۆ ئەوانەی لە ئێستاداو لە ۳۰ی ساڵی گوزەشتەدا بوون و کراون بە دەم ڕاستی خەڵکی کوردسان- عێراق یان هەر کەسەو بەناوی گەلەوە لێدوانی دەدات…

لەدوای ئەوەی لە (70%)ی عێراقیەكان دەنگیان بە دەستوور دا ئەم چەند زاراوەیە دەڵێینەوە:
(رەزامەندبوون-هاوبەش بوون-هاوسەنگی بوون) ئەمانە كران بەكارنامەی كار بۆ گشت پێكهاتە عێراقییەكان لەسەر بنەمای بەڕێوەبردنی عێراقێكی نوێ، بەڵام کارکردن بەم كارنامەیە بە (عەمەلی) نەبینراوە دوای ئەو هەموو (بگرەو بەردە) و تاقیكردنەوانە تێگەیشتین تەنها ڕێگای چارەسەر دانوستانە لەسەر جێبەجێكردنی (ئەساس نامە) كەی دەوڵەتی عێراقی كە ناونراوە دەستوور، ئەوكات زۆر شت ئاشكرا دەبێت، پاشان هەركەس ملی نەدا بەپێی ئەو (ئەساس نامەیە) ڕەفتار بكات پەنا دەبرێت بۆ (دادگای فیدراڵی) بۆ یەكلاكردنەوەی كێشەكان، هەرچەند تاوەكو ئێستا دادگای فیدراڵی نەهێڵراوە بەسەر بەخۆیی بمێنێتەوە.

تازە بەتازە لەم سەرەتای بەهارەدا بە (208) ئەندام پەرلەمان دەنگ درا لەسەر بەگەڕخستنی سەرۆك و ئەندامانی دادگاكە بەو هەموو گلەیی و گازندەییەی كە فقیهەكان و دادوەران و یاساناسان ڕوونیان كردوەتەوە كە چەند بڕگەیەكی پێچەوانەی دەستوورەكەیە، بەڵام تێ پەڕێنرا!
پرسیارەكە ئەمەیە گەر رێك بكەوین لەسەر (رەزامەندبوون-هاوبەشبوون-هاوسەگی بوون) ئەم هەرایەی بۆچی یە؟! زۆرینەی زۆری عێراقیەكان جەورو ستەمی بینیوەو لەژێر دەستی ستەمكارانی رابردوو و ئێستادا، هەریەكەو بە ڕێژەیەك، بەڵام بەداخەوە ئێمەی عێراقی هەمیشە رابردووی خۆمان لەبیر دەكەین و ئایندەی خۆمان نابینین، بۆیە زۆرێك لە عێراقیەكان كاتێك بەرپرسیاریەتیان گرتە دەست ئەبێت بە دیكتاتۆر! هەر ئەوە وایكرد ئەم ساڵ بڵێین خۆزگەمان بە دزو جەردەو قاچاخچی و ستەمكارانی پێشووتر.

وەك ئەڵێن (95%)ی عێراقیەكان بەپێی ناسنامە موسوڵمانن دەی گەر گوێڕایەڵن بە فەرمانەكانی خواو پێغەمبەر نابێت ببن بە ستەمكار چونكە (الله) لە فەرموودەیەكی (قودسی)دا فەرموویەتی: ستەمم لە خۆم حەرام كردووە بە ندەكانم ئێوەش لە نێوان خۆتاندا ستەم لەیەكتر مەكەن.

ئەگەر بەرپرسەكان هەمووتان واژۆتان كردووە لەسەر سێ زاراوەكەی (توافق و شەراكەت و توازن) وڵات بەڕێوە بەرن چۆن دەكرێت پێكهاتەیەكی زۆرینە پێكهاتە كەمینەكان بێ بەش و ریسواكات ئەگەر پابەند بێت بە مەزهەب و ئایین و نەتەوەوە، هەموان ئەڵێن (عەدالەت ئەساسی ژیانە) كەواتە ئەبێت راستگۆبین لەگەڵ دین و گەل و وڵاتمان، ناكرێت لەواقع راكەین و مێژوو لەبیركەین.

ئەگەر لاپەرەكانی مێژوو هەڵبدەینەوە لەسەرژمێری ساڵی (1967)ی عێراقدا دوای ئەو ڕاپرسیە (د.شاكر خصباك) كتێبێكی دانابوو بەناوی (عێراقی شمالی) بڕواناكەم كەسێكی تر هەبێت لە ژینگەیەكی وەهای جەنجاڵ و پڕ لە كێشمەكێشم لە عێراقدا بتوانێت ئەو وردەكاریە بكات كە ئەو كردویەتی لەسەر دانیشتوانی پارێزگای كەركوك، چونكە كوێرە دێیەك نییە باسی نەكردبێ و تۆماری دانیشتوانەكەی نەكردبێ، تیرەو هۆز و عەشیرەت نییە لەبیری چووبێت، ئەو كتێبەی لە كۆلێژی ئاداب لە قۆناغی چوارەم دا لە زانكۆكان دا لە دەخوێنرا، کە تیایدا هاتووە ژمارەی دانیشتوانی كورد لە عەرەب، تورك و پێكهاتەكانی تر زیاتر بووە.. ئەو كاتە پێكهاتەكان رقیان لەیەكتر نەبووە هەموو وەك برا پێكەوە دەژیان، بەڵام سەد (مخابن) ناحەزان و ستەمكاران ئەوەیان دروست كرد كە ئێستا تێی كەوتووین! لەلایەكی تر كاربەدەست و بەرپرسانی خۆمان ئەم مێژووەیان شێواند كە دڵی كوردستان و قودسی كوردستان بوو!!.
زاراوەیەكی نوێیان لەناو دەستووردا تۆمار كرد بەناوی (مناطق متنازع علیها)، جا ئێستا زۆر ئەستەمە ئەو (خاك و ئاوە) بگەڕێتەوە بۆ خاوەنە ڕەسەنەكەی مەگەر بە (قودرەتی قادر) رووداوێك بێتە پێش و مافی ستەم لێكراوان بێتەوە دەستی خۆیان.

ئەبێت ئەوە بزانرێت عێراقی ئەمڕۆ عێراقی دوێنێ و چەند ساڵی پێشوو نییە، هەرچۆن بووە ئەبێ چارەسەرێك بدۆزرێتەوە بۆ خەڵكی كورد لەو جوگرافیا دیاریكراوەدا كە پێی دەوترێت جێ ناكۆكییە لەسەرەكان.

گەر بارودۆخ وەك ئەمڕۆ گوزەر بكات چی ڕوودەدات، ئەمەی دەیڵێین بە دڵسۆزانە وەڵام بدەنەوەو لەبەرچاوی بگرن، خەریكە وامان لێ دێت بڵێین (چووین بۆ ڕیشمان سمێڵمان نا لەبانی).

بۆیە دەڵێین دەسەڵاتداران بە سیاسەتی خۆتاندا بچنەوە مەرج نییە هەرچیش بڕیاردرا دروست بێت یان لەكاتی دەسەڵات و كاتی گونجاودا بڕیار بدەن و داهاتوو لەبیر بكەن، راوێژ لە بیرمەكەن واقیعیانە بیر بكەنەوە

ئێمە (ماران گەستەین) نازانین چۆن بیر دەكەینەوە، لە دوای لابردنی دەسەڵاتدارانی ستەمكاری چەند ساڵ لەمەوبەر بەبێ خەڵكی كوردستان (میراتی)یەكەیان بۆ بەجێما، هەر لەم نزیكانە بوو بەبێ كورد بڕیاری (قەرزكردن) لەپەرلەمان پەسەند كرا بەڵام كوردستان بێ بەش كرا لەو (قەرزە).
زۆرجار بەرپرسانی هەرێم هەریەكەو بە جیا، یان وەفدی دانوستانكاری نێوان هەرێم و بەغدا دەیڵێنەوە كە زۆر مادەی دەستووری پێشێلكراوەو حكومەتی ناوەند جێبەجێی نەكردووە و لێی بەرپرسیارە، هەر ڕۆژەو بەهانەیەك دەهێننە پێشەوە،
ناكرێت ئەم هەموو كێشانە بە چارەسەرنەكراوی بهێڵرێنەوەو یەكلایی نەكرێتەوە، ئایا هەرێم بەڵگەی داوە بەدەستەوە كە ناحەزانی خەڵكی كوردستان رووبەڕووی ئەم واقیعە تاڵە ببێتەوە.

وامان لێ كراوە (چۆن چۆلەكە كە پەتێكی بەقاچەوە بەستراوە ئەوەی وای لێ كردوەو بە ئارەزووی خۆی پەتەكە درێژوو كورت دەكات)، ئەمە ڕوون بكرێتەوە بۆ گشت عێراقیەكان و بۆ وڵاتانی دونیا گەر هەر لایەك خەتابارە راشكاوانە ئاشكرا بكرێت.

لەئەمڕۆدا هەرچۆن بووەو هەرچی هەیە یەكدەنگی كوردستانیان و دەسەڵاتی سیاسی هەرێم بۆ سەندنەوەی مافی رەوای جەماوەری كوردستان ڕێژەی نەگۆڕ بێت، نەك لە دەست بدرێت، لێرەوە بە بەرپرسانی (pdk-puk) دەڵێین لە رقی یەكتر ئەم گەلە لەمە زیاتر ریسوا مەكەن، ئیتر بەسە خوای گەورەش داوای یەكڕیزی و یەكهەڵوێستی و یەكدەنگیتان لێدەكات و پەرتەوازەیی و ناكۆكی هەمیشە باجی گەورەی بەدواوە هاتووە، مێژووی كوردیش زۆر رووداوو هەڵوێستی لەم جۆرانەی تێدا تۆمار كراوە، بۆیە دەڵێین مێژوو ئاوێنەی گۆڕان و پێشكەوتن و پاشكەوتنە.

ئەوەتە وڵاتان هاوكارتان دەبن گەر سوپاكەتان یەك بخەن، بەڵام جەماوەر بێ هیوا بووە لێتان! هۆكار چییە (30) ساڵە حكومەتن وەزارەتی پێشمەرگە دەسەڵاتی بەسەر یەكەی (70) و (80)دا نییە ناوە ناوە راگەیاندنەكان دووبارەی دەكەنەوە،
بەڵام هەر قسەی میدیاو سۆشیال میدیایەو ئەم لێدوانانەی راگەیاندنەكانیش ناچێتە گیرفانتانەوە، چونكە تاقیكراوەتەوە هەر لایەنێكتان (ئیعاز) بدەنە بەشەكەی خۆتان ئەوا لەبەشەكەی تر جیا دەبێتەوە گەر لە سەنگەریشدا بن لەكاتی رووبەڕوو بوونەوەی ناحەزانی ئەم هەرێمەدا.

مێژوو ڕەحم بەكەس ناكات، لەسەر خەیاڵ مەژین، هەركامێكتان هەوڵی لاوازی ئەوی ترتان بدات خۆی لاوازتر دەبێت، بەیەكگرتنەوەی هێزی پێشمەرگە ناحەزانی هەرێم و حكومەت و پەرلەمانی كوردستان دەستەوسان دەبن لەبەردەم هێز و هەڵوێستی یكگرتووی دەسەڵاتی سیاسی و گەلی كورد.

ئەوەی لەم چەند ڕۆژەی رابردوودا پەرلەمانتارە كوردەكان و پەرلەمانتارەكانی تری عێراقی هەوڵیاندا كە بە یاسایەك بڕیاری بەپارێزگابوونی هەڵەبجە پەسەند كرا، هەموو خەڵكی كوردستان دەستخۆشی لەو هەنگاوە جوامێرانەی كرد، بۆ هەموو هەنگاوێك كە بیر تەسكی حزبایەتی نەبێت خواستەكانتان بە پشتیوانی پەروەردگار دێتە دی.

لەكۆتاییدادەڵێم نەكەن یادی خوا لەبیر بكەن دەست بە حەبلی خواوە بگرن سەرفراز دەبن لە دونیاو دواڕۆژدا خزمەتی گەل و خاكی خۆتان بكەن بەبێ بەرانبەر هەردەم براوە دەبن، یەكتر قەبوڵكردن گەورەییە، راوێژ بەیەكتر كردن دەستمایەیەكی نەبڕاوە دەبێت بۆ بەرپرسان.

كامیل حاجی عەلی
۲۳ی ئازاری ۲۰۲۱ 

لێدوان بنوسە لەڕیگای فەیسبووکەوە

بابەتی دیكە

Close