بزووتنه‌وه‌ی ئیسلامیكوردستانهەواڵ

وته‌بێژی بزووتنه‌وه‌:حیزبەکانی دەسەڵات بەری ڕەنجی ڕاپەڕینیان بۆخۆیان قۆرخکردووە

لەبیرەوەری یادی ڕاپەڕینەکەی بەهاری1991دا
ووتەبێژی فەرمی بزووتنەوەی ئیسلامی ڕایگەیاند.
:
حیزبەکانی دەسەڵات بەری ڕەنجی ڕاپەڕینیان بۆخۆیان قۆرخکردووە
ئەمڕۆ پێنج شەممە ٥ی ئازاری ۲۰۲۰ بەبۆنەی یادی ڕاپەڕینی جەماوەری هەرێمی کوردستان بەڕێز دکتۆر عبداللە وەرتی ووتەبێژی فەرمی بزووتنەوەی ئیسلامی لەلێدوانێکی رۆژنامەنووسیدا ڕایگەیاند: ڕاپەڕین جگە لەیادەوەریەك هیچ شتێکی تری بۆ نەماوەتەوەو ساڵ لە دوای ساڵیش بایەخ و گرنگی ئەم بۆنە نەتەوەییە کاڵ دەبێتەوەو حزبەکانی حکومڕانی هەرێمی کوردستانیش لەبەر ئەوەی بە ئامانجەکانی خۆیان گەیشتوون کەپلەو پۆست و پارەو مەنسەب و کۆشکو تەلارە مەگەر بۆ زاخاوی مێشک ئەگینا بەلای بۆنە نەتەوەیی و نیشتمانیەکاندا ناڕۆن .

ووتیشی: “ئێمە وەك بزووتنەوەی ئیسلامی کوردستان بەدەیان شەهیدمان داوە لەڕاپەڕینی بەهاری ۱۹۹۱ کەچی خانەوادەی شەهیدەکانمان بێ بەشترین کەسوکاری شەهیدانن و تائێستا زۆربەیان زەویی و مووچەیەکی شاییستەیان پێنەدراوە، بۆیە ناعەدالەتیە کەجیاوازی لەنێوان شەهیدەکانی خۆیان و لایەنەکانی تردا دەکەن .

ئاماژەی بەوەشکرد: بەداخەوە دەسەڵات بەهۆی زوڵم و نادادپەروەری وای لە زۆربەی خەڵکی کوردستان کردوە پەشیمان بن لەوەی کەڕاپەڕینیان ئەنجامداوە، چونکە پێیان وایە بەری ڕەنجو خەباتی ئەوان لەلایەن چەند کەسو گروپێکەوە دزراوە، بۆیە دەبێت حزبەکانی دەسەڵات واز لەو نادادپەروەری و قۆرخکاریە بێنن کەچەندین ساڵە ئەنجامی دەدەن.

لەکۆتاییدا ڕاشیگەیاند: یادەکانی ڕاپەڕین لەهەموو کەسێکی نیشتمان پەروەرو خانەوادەی سەربەرزی شەهیدان پیرۆز بێت و جێگەی خۆیەتی دەسەڵات بێتەوە هۆش خۆی و واز لەدروشم بازی بێنن و بەکردەیی ئاوڕ بدەنەوە لە خانەوادەی سەربەرزی شەهیدانی ڕاپەڕین و بەرزکردنەوەی ئاستی هۆشیاری نیشتمانی و نەتەوەیی و سزادانی ئەوانەی کە بەری ڕەنجی خەڵکی کوردستانیان بۆ خۆیان دزیوەو ماوەی ۳۰ ساڵە لەگەندەڵی و فەسادی تێوەگلاون …
2021/3/5

لێدوان بنوسە لەڕیگای فەیسبووکەوە

بابەتی دیكە

Close