كوردستانهەواڵ

حاکم رزگار: دادگای پێداچونەوە دەتوانێت سزادانی گیراوانی بادینان هەڵبوەشێنێتەوە

ئەندامێكی دادگای پێداچوونەوە لەبارەی بەیاننامەكەی ئەنجومەنی دادوەری رایدەگەینێت زۆرتر كاری كارگێڕی و ئیداری دەكات و مافی نیە لێدوان وبەیاننامە لەسەر دۆسیە دادوەریەكان بڵاوبكاتەوە، دەشڵێت لە تەمەنی كاركردنی لە بواری دادوەریدا ئێستا دۆخی دادوەری لە خراپترین دۆخدایە.

 دادوەر ڕزگار محەمەد ئەمین، ئەندامی دادگای پێداچونەوەی هەرێمی كوردستان لە دیدارێكدا لەگەڵ دەنگی ئەمریكا لە بارەی سزادانی پێنج  كەس لە دەستگیركراوانی بادینان رایگەیاند: بێگومان ئەو حوكمانەی كەلەدادگای تاوانەوە دەردەچێت شیاوی پێداچوونەوەیە لەدادگای “تەمیز- پێداچوونەوە” هەندێك بڕیار هەیە ئەگەر خاوەنی كێشەكە تەمیزی نەكاتەوە هەرخۆی پێی دەڵێن “وجوبی” واتە بەخۆڕسك دێتە دادگای پێداچونەوە. 
ئەو  لەبارەی دۆسیەی پێنج سزادراوەكەی بادینان وتیشی: من وەكو دادوەرێك هەتا مەلەف نەبینم ناكرێت قسە بكەم، لەڕاستیشدا چونكە من ئەندامی دادگای پێداچونەوەم بەڵام ئەو كێشە “جەزائیانە” مەگەر سزای لەسێدارەدان بێت ئەگەرنا نایەتە لای من، من كێشەی نەوجەوانان دەبینم بۆیە ئێستا هەرچی بڵێم ئەوە لەخۆوەیە.”
ناوبراو لەبارەی راگەیەندراوەكەی ئەنجوومەنی دادوەری كە لەو بارەیەوە بڵاویكردبوویەوە دەڵێت “هیچ كەس و لایەنێكی دادوەری مافی ئەوەی نیە نە بەباش یاخود پێچەوانە قسە لەسەر دۆسێیەك بكات كە هێشتا نەیبینووە و كاری ئەو نەبێت چونكە ئەوە كاری دادگای پێداچونەوەیە پاش بینینی دۆسێیەكە كەهێشتا نەیبینیووە”. 
ئەو دادوەرە دەشڵێت “ئەنجوومەنی دادوەری مافیان نییە قسە بكەن لەسەر كێشەكە بڵێن ئەم كێشەیە واباش بەڕێوەچووە یان هەر تەعلیقێكی تر لەوبارەیەوە چونكە ئەوكات ئەو بابەتە لەدواجاردا دەبێت بچێتە بەردەمی ئەو دەستەیە یا دادگای پێداچوونەوە جا دەستەی پێنج كەسیەكەیە یان دەستە گشتیەكەیە”. 
هەروەها دەشڵێت “ئەنجوومەنی دادوەری جیهەتێكی ئیدارییە پەیوەندی هەیە بەچۆنیەتی ئیدارەكردنی بارودۆخی قەزایی و چۆنیەتی دانانی دادوەر و چۆنیەتی گواستنەوەی و مۆڵەت و فەرمانبەر و هەندێك سەڵاحیەتی تر كە یاسای دەسەڵاتی دادوەری هاتووە بەڵام قسەكردن لەسەر كەیسێكی قەزائی، هونەری كە ئەم بڕیارە دروستە یان دروست نییە ئەوا دادگای تەمیز بەتەنها ئەو مافی هەیە بڵێت ئەم بڕیارە بڕیارێكی دروست و قانونی و بەشێوەیەكی ڕێكوپێك دەرچووە یان دەرنەچووە.”
ئەو ویشی: لەناو دادوەرانیشدا دادوەری زۆر مەبدەئی هەیە و كاریگەری لەسەر نابێت ئەگەر ئەو كەیسە بچێتە بەردەمی جاری واهەیە دادوەر بەڕێگەیەكی تر ڕێگری دەكرێت لەئیشكردن لە كەیسە گرنگەكاندا نایخەنە بەردەستی ئەو ئەوە بابەتێكی ترە بەڵام من بۆخۆم ئێستا ناتوانم بڵێم كەیسەكە هاتە دادگای پێداچونەوە بەشێوەی دروست سەیرناكرێت چونكە یەك كەس و دووكەس تەماشای ناكات بەڵكو ئەوانە دەگەڕێتەوە دەست ئەو دەستەیە كەدەچێتە بەردەستیان بڕیارەكە بەزۆرینە و كەمینە دەردەچێت. 
ڕزگار محەمەد ئەمین راشیگەیاند، نزیكەی چل ساڵ دەبێت لەدەزگای دادوەریدا ئیش دەكەم لەیاریدەدەری دادوەرییەوە هەتا گەیشتومەتە ئەم قۆناغە كەقۆناغی دادگای پێداچوونەوەیە “لەئێستا خراپتر باری دادوەریم نەبینیووە لەو قۆناغانەی كە بۆخۆم بینیوومە. قۆناغی دادوەری و بارودۆخی عەدالەت و یاسا ئێستا لەخراپترین ئاستدا دەبینم لەعێراق بەگشتی و لەهەرێمی كوردستانیش بەتایبەتی.”
ئەو دادوەرە دەشڵێت: لەسەر بنەمای ئەو “مشاهداتانەی” خۆم قسە دەكەم كەئێستا تێیدا دەژیم بەڵێ دەڵێم لەوە خراپترم نەبینیووە چ لەڕووی ئیدارەوە چ لەڕووی باری جێبەجێكردنی یاسا و ئیجتهادات و لایەنی زانستی و بەدەر لەوەی كە دادوەری فەرد هەیە، دادوەری بەتوانا و ڕێكوپێك هەیە. 

لێدوان بنوسە لەڕیگای فەیسبووکەوە

بابەتی دیكە

Close