كوردستانهەواڵ

مامۆستایەکی ئاینی: دیاریکردنى وتارى ئاینى پێچەوانەى شەرعە

دوای ئەوەی وەزارەتی ئەوقافی هەرێم بڕیاری یەکخستنی وتاری هەینی دەرکرد، مامۆستایەکى ئاینى رایگەیاند، “ئەگەر دەسەڵات دەیەوێت مامۆستایانى ئاینى لەبارەى ئەو وتارەوە قسەبکەن، کە ئەوان دیاری دەکەن ئەوا با رادیۆیەکى تایبەت بکەنەوە و مامۆستایان بچن لەوێ ئەو وتارانە بخوێننەوە.”

ئیدریس کاریتانى مامۆستاى ئاینى بە ئێن ئاڕ تى راگەیاند، “کاتێک خوداى گەورە وتارى فەرزکردووە تاوەکو چارەسەرى گرفتى ناوچە جیاوازەکان بکرێت، کاتێک دەسەڵات گرفتەکانى هاوڵاتیان پێکەوە دەبەستێتەوە ئەوەش واتا هاوڵاتیانى سەرجەم ناوچەکان وەک یەک بیردەکەنەوە و ئاستى توانا و کیشەکانیان وەک یەکە، لەکاتێکدا گرفتەکانى هاوڵاتیان جیاوازە”.

ئیدریس کاریتانى راشیگەیاندووە، “دیاریکردنى وتارى ئاینى پێچەوانەى شەرعە چونکە خوداى گەورە وتارى فەرزکردووە بۆ چارەسەرى کێشەکانى کۆمەڵگا.”

ئاماژەى بەوەشکرد، “ئەگەر دەسەڵات دەیەوێت مامۆستایانى ئاینى لەبارەى ئەو وتارەوە قسەبکەن کە ئەوان دیاری دەکەن، ئەوا با رادیۆیەکى تایبەت بکەنەوە و مامۆستایان بچن لەوێ ئەو وتارانە بخوێننەوە کە ئەوان دیاری دەکەن و هاوڵاتیانیش گوێبیستى بن”.

ئەوەشى خستەڕوو، “وتار دیاریکرا لە رووى شەرعەوە ناوەرۆک لەدەستدەدات و لەرووى یاسایشەوە پێچەوانەى دەستورە، چونکە دەستورى عێراق ئازادى داوەتە سەرجەم تاکەکان سەربەستانە ئازادییەکانى خۆى بەرجەستە بکات، بەڵام لەچوارچێوەى پاراستنى ئاسایشى نیشتیمانیدا”.

ئەوەش دوایی ئەوەدێت، لەلایەن بەڕێوەبەرایەتی ئەوقافی هەولێرەوە مامۆستایانی ئاینی ئاگادارکرابوونەوە، کە پابەندبن بە وتاری رۆژانی هەینی لەلایەن بۆردی  ئاینی وەزارەتی ئەوقاف دانراوە.

لێدوان بنوسە لەڕیگای فەیسبووکەوە

بابەتی دیكە

هەروەها

Close
Close